Dayikên Şemiyê, di hefteya 1039emîn de li aqûbeta Murat Yildiz pirsîn û xwestin edalet cihê xwe bibîne.
Dayikên Şemiyê/Mirovên Şemiyê, di hefteya 1039an de li Qada Galatasarayê kom bûn û aqûbeta xizmên xwe yên di bin çavan de hatine windakirin û kuştin pirsîn. Dayikan xwestin kiryar bên darizandin edalet pêk bê. Dayikên Şemiyê/Mirovên Şemiyê li Qada Galatasarayê bi qurnefîlên di destên xwe de û wêneyên windayan kon bûn. Hevseroka Giştî ya Komeleya Mafên Mirovan (ÎHD) Eren Keskîn û parêzvanên mafên mirovan tevlî çalakiyê bûn. Di çalakiya vê heftê de li aqûbeta Mûrat Yildiz ê ku di sala 1995an de hate windakirin pirsîn. Endama Komîsyona Girtîgehan a ÎHD’ê Sebla Arcan daxuyanî xwend. Sebla Arcan, anî ziman ku tevî barîna berfê, ji çar aliyê bajêr hatin û li Qada Galatasarayê kom bûn û wiha dest bi axaftina xwe kir: “Em li vir in, ji ber ku em nizanin ku piştî hezkiriyên me hatin binçavkirin çi çi hatiye serê wan. Di şert û mercên ku dewletê hemû deriyên xwe li me girtiye, mafên me tên paşguhkirin. Darazê têkiliya xwe ya bi hiqûqê re qut kiriye. Siyasetê jî hêza xwe ya çareseriyê winda kiriye. Em ne tenê ji bo windahiyên xwe, ji bo demokrasî û serweriya hiqûqê jî têdikoşin.”
Sebla Arcan, serpêhatiya Murat Yildiz ê ku 30 sal beriya niha di dema binçavkirinê de hatiye windakirin vegot û bal kişand ser lêgerîna hiqûqî. Sebla Arcan, da zanîn ku çiqas sal jî derbas bibin, dê ji bo Murat Yildiz û hemû windahiyan lêgerîna xwe ya pêkanîna edaletê bidomînin û got: “Divê dewlet li gorî pîvanên hiqûqa gerdûnî tevbigere.”
Seroka Şaxa ÎHD’ê ya Stenbolê Gulseren Yolerî jî di çalakiyê de axivî û got: “Murat Yildiz di binçavande de hat windakirin, lê ne tenê winda bû, hemû qeyd û dosyayên aîdî wî jî hatin windakirin. Dema me li ser çarenûsa dosyayê lêkolîn dikir, hat gotin ku dosya mehekê di arşîvê de ye. Lê dema me berê lê nihêrî tu carî dosyayek wisa yê Yıldız tune bû. Di deftera dozgeriyê de nota “întîxar kir” hatibû nivîsandin, lê îfadeyên gelek caran yên diya wî yên windayan û serlêdan û daxwazên wê yên ji bo dîtina wê nehatin girtin. Dosya ji destpêkê ve bi îdîaya întîxarê hat girtin û tenê ji bo polîsên ku bûne sedema windabûna Mûrat Yildiz hatiye vekirin, cezayê pere hatiye birîn, lê ev ceza jî nehatiye dayîn.”
Piştre dayika Murat Yildiz Hanîfe Yildiz jî axivî û got: “Min bi destê xwe kurê xwe bir. 30 sal e ez li kurê xwe û edaleta xwe digerim. Binêrin edalet çi kiriye, her der bi têlan hatiye dorpêçkirin. Ev jî karê AKP’ê ye. Ez di salvegera wefata dayika Berfo de bi rêzdarî, bejna xwe ditewînim.”
Piştî axaftinan çalakvanan qurnefîl danîn qadê û çalakî bi dawî bû.
