Dayikên Şemiyê di hefteya 1110emîn de li aqûbeta Hasan Gulunay ê 20ê Tirmeha 1992yan de (34 sal) hatibû windakirin pirsin û gotina Hasan parve kirin “Ez Hasan Gulunay, dixwazin min di binçav de winda bikin.”
Dayik/Mirovên Şemiyê bi daxwaza “Bila winda werin dîtin, kujer bên darizandin” di hefteya 1110emîn de li Qada Galatasarayê ya Stenbolê çalakiya xwe ya heftane li dar xistin. Dayikên Şemiyê, endam û rêveberên ÎHDa Stenbolê, Dayikên Aştiyê û gelek parêzvanên mafên mirovan tev li çalakiyê bûn. Di çalakiyê de wêneya windayan hatin hilgirtin. Vê hefteyê li aqûbeta Hasan Gulunay ê berî 34 salan 20ê Tirmeha 1992yan de hatibû windakirin, hate pirsîn.
Metna daxuyaniyê Mirova Şemiyê Jiyan Kaya xwend.
‘Ez Hasan Gulunay, dixwazin mi di binçav de winda bikin.’
Jiyan Kaya diyar anî ziman ku Alî Ekber Atmaca di 23yê Gulana sala 1992yan de li Artvînê hate binçavkirin, bi îşkenceyê hate kuştin û wiha behsa berdewama aqûbeta Hasan Gulunay kir: “Li ser Alî Ekber Atmaca ehliyeta Hasan Gulunay derket. Hasan ji bo ehliyeta xwe îlana windabûnê dabû. Bi vê sedemê polîsan dest bi lêgerîna bavê 4 zarokan Hasan Gulunay kir. 20ê Tirmeha sala 1992yan de Hasan ji bo kar ji mala xwe ya Tarabyayê derket û êdî venegeriya mala xwe. Kesek cihê kar a Hasan geriya û got ‘ew ji şaxa têkoşîna li dijî terorê digerê û Hasan hatiye binçavkirin.’ Lê tevî serlêdanên malbatê jî bersiva ‘Hasan nehatiye binçavkirin’ ji wan re hate dayîn. Paşê Malbata Gulunay bi rêveberê Emniyeta Stenbolê Huseyîn Kocadag re hevdîtin pêk anîn. Huseyîn Kocadag ji malbatê re got; Hasan Gulunay di binçav de ye, sax e. Piştî ki di laşê wî de şopên îşkenceyê jê herin bê berdan. Kesê bi navê E.Ç. jî Hasan Gulunay di Emniyeta Stenbolê de dîtibû. Hasan Gulunay ji E.Ç. re gotiye ‘Ez Hasan Gulunay, dixwazin mi di binçav de winda bikin.’ Kesê bi navê H.K jî diyar kiribû ku ew 19ê Tirmeha sala 1992yan de hatiye binçavkirin û bi rojan îşkence lê hatiye kirin. Polîsan ji H.K. re gotiye ‘Me Hasan Gulunay kuşt, dem dora te ye.”
‘Em ê pirsîna aqûbeta windakiriyan bidomînin’
Di dawiya axaftina xwe de Jiyan Kaya anî ziman ku malbat serî Serokwezîrtî, Wezareta Karên Navxweyî û tevahî saziyan pêwendîdar xistiye û wiha pê de çû: “Wezaretê Karên Navxweyî Nahît Menteş li Meclîsê bersiv da pêşniyazpirs û got ‘Ev tevahî îdîa propagandayê rêxistinên terorê ne. Hezên me wekî herdem ji bo yekitiya dewletê dixebitin.’ Dadgeha Destûra Bingehîn (DDB) di 21ê Nîsana sala 2016an de biryara lêpirsînek baş nehatiye meşandin da. Lê aqûbeta Hasan Gulunay nehat eşkerekirin. Em di windakirina 34 salemîn a Hasan Gulunay de bang rayêdarên dewletê dikin. Divê dewlet berpisiyartiyên xwe bi cih bîne. Çend sal derbas dibe bila bibe em ê li aqûbeta kesên winda bipirsin.”
Çalakî bi danîna qerenfîlên li Qada Galatasarayê bi dawî bû.
