Bi sedan ciwan bi dirûşma “Bi têkoşîna ciwanan em ê destûreke demokratîk û Sûriyeya demokratîk ava bikin” nerazîbûn nîşanî “Danezana Destûrî” ya desthilata Şamê dan.
Bi sedan endamên Tevgera Ciwanên Şoreşger ên Sûriyeyê bi armanca redkirina Danezana Destûrî ya ji aliyê desthilata Şamê ve hatiye îmzekirin, meşek li dar xist. Ciwanên ku ji Tebqa û Dêrazorê hatin Reqayê bertekên xwe yên li dijî Danezana Destûrî anîn ziman. Ciwanan ji pêşiya Nexweşxaneya Firat a li bajarê Reqayê dest bi meşekê kir û li Qada Jina Azad sekinîn. Li wir hevseroka Desteya Ciwan û Werzîşê ya Rêveberiya Xweseriya Demokratîk a Herêma Bakur û Rojhilatê Sûriyeyê Avaşîn Misto daxuyaniyek xwend.
Di daxuyaniyê de hate bibîrxistin ku şoreşa Sûriyeyê di sala 2011an bi armanca rûxandina rejîma dîktator û bidawîkirina zilmê dest pê kir. Ciwanan di dewama daxuyaniyê de gotin: “Ciwanan ji bo parastina herêmê ji êrişên rejîmê û komên tundraw ên wekî DAIŞ’ê; YPG, YPJ û QSD ava kirin û herêm ji terorê rizgar kir. Ev hêz di hevsengiya Sûriyeyê de bûye hêzeke sereke.”
Ciwanan destnîşan kirin ku Danezana Destûrî nûnertiya hêviyên gel nake, lê pergala despot bi rengekî nû zindî dike. Piştî xwendina daxuyaniyê dirûşmên “Bijî berxwedana Rêber Abdullah Ocalan” û “Bijî berxwedana HSDê” hatin berzkirin.
