Welatiyên bajaroka Pirxûsê ya navçeya Xelat a Bedlîsê ku li dijî GESê derketin, rastî êrişa cendirmeyan hat. Di encama êrişê de herî kêm 15 kes hatin binçavkirin û gelek welatî jî birîndar bûn.
Li bajaroka Pirxûsê ya navçeya Xelat a Bedlîsê, welatiyan bertek nîşanî projeya Santrala Enerjiya Rojê (GES) da ku tê xwestin li wir were avakirin. Tîmên cendirmeyan êrişî welatiyan kir. Hat zanîn ku di êrişê de herî kêm 15 kes hatine binçavkirin û gelek welatî jî birîndar bûne û li nexweşxaneyê tên dermankirin. Welatî ji şeva borî ve li dijî santrala ku ji aliyê Ecowind 1 Enerji A.Ş. ve tê xwestin li bajarok were avakirin, li ber xwe didin.
Welatiyan ji pêşiya Şaredariya Pirxûsê ber bi qada projeyê ve bi dirûşmeyên “Şaredarî îstifa” meşiyan. Piştî meşê, li qada projeyê daxuyaniyeke çapemeniyê hat dayîn.
