MEBYA-DER û nûnerên saziyên sivîl bi girseyî serdana şîna Zarîn Akbaş (Arjîn Garzan) kirin ku di 28ê Hezîranê de di encama êrîşa rejîma Îranê de jiyana xwe ji dest dabû.
Bi pêşengiya Komeleya Alîkarî, Pişgirtî, Çand û Yekîtiya bi Malbatên ku Xizmên Xwe di Dergûşa Şaristaniyan de Windakirine re (MEBYA-DER), taziya Zarîn Akbaş (Arjîn Garzan) a ku di 28ê Hezîranê de di encama êrîşa rejîma Îranê de jiyana xwe ji dest dabû, hat ziyaretkirin. Di şîna ku li mala malbatê ya li gundê Çorsênê yê navçeya Tetwana Bedlîsê hat danîn de dirûşmên ‘Şehîd namirin’ û ‘Jin Jiyan Azadî’ hatin berzkirin.
Hevserokê DEM Partiyê yê Bedlîsê Şevder Bîngul di taziyê de axivî û diyar kir ku ew ê xwedî li têkoşîna wê derkevin.
Şevder Bîngul destnîşan kir ku divê her kes beşdarî pêvajoya aştiyê û civaka demokratîk bibe û wiha got: “Li ser milên me barekî giran heye. Îro şehîd Arjîn bi bîra me dixe ku di vê pêvajoyê de divê her kes bi hişmendiya berpirsyariyên xwe rabe û wan bîne cih. Ew dibêje ‘Heke me di vê rêyê de canê xwe dabe, divê hûn jî berpirsyariyên ku dikevin ser milên we bînin cih’.”
‘Em ê li ser şopa wan bimeşin’
Parlamenterê DEM Partiyê yê Bedlîsê Huseyîn Olan jî anî ziman ku gelê Kurd bi salan e bedelên giran dide û wiha axivî: “Bi hezaran ciwanên Kurd axa xwe parastin. Wekî ku me her tim soz daye wan, em îro jî soz didin. Em ê keda şehîdên xwe û rêya wan ji bîr nekin. Em ê li ser şopa wan bimeşin.”
Li ser navê malbatê jî bav Velyeddîn Akbaş û dayik Salîha Akbaş axivîn. Malbatê diyar kirin ku Zarîn Akbaş ne ciwana yekem e û ne jî ya dawî ye ku jiyana xwe ji dest dide û wiha gotin: “Arjîn ne tenê zaroka me ye, zaroka hemû gelê Kurd e. Serê hemû gelê Kurd û Serokê me sax be.”
Taziye dê sê rojan berdewam bike.
