Amed – MEBYA-DERê ji bo şehîdên di tekoşîna azadiyê de jiyana xwe ji dest dane li eywaneke dawetê ya li navçeya Rezan a Amedê mewlûd da. Hevserokê DEM Partiyê Tuncer Bakirhan tev li mewlûdê bû û got: “Em ê xeyalên şehîdan ên ji bo jiyanek azad têkoşiyane, pêk bînin.”
Komeleya Yekîtî, Çand, Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Amedê ji bo şehîdên di têkoşîna azadiyê de jiyana xwe ji dest dane li Eywana Geterler a li navçeya Rezanê ya Amedê mewlûdê da. Hevserokê Giştî yê DEM Partiyê Tuncer Bakirhan, endam û rêveberên partiyên siyasî û nûnerên saziyên civakî û gelek malbatên cangoriyan tev li mewlûdê bûn.
Bernameya mewlûdê bi deqeyek rêzgirtina ji bo şehîdan dest pê kir. Di bernameyê de pankartên “Şehîd rûmeta me ne”, “Şehîd namirin” û “Malbat şopdarê şehîdên xwe ne” hatin vekirin û gelek caran dirûşma ‘Şehîd namirin’ hat berzkirin.
‘Divê Kurdekî azad û civakek azad bê avakirin’
Di bernameyê de aktîvîsta Tevgera Jinên Azad (TJA) Şadiye Manap axivî û bal kişand ser berxwedana jinên ku di têkoşîna azadiyê de jiyana xwe ji dest dane. Şadiye Manap diyar kir ku jinan di têkoşîna azadiyê de berdelên giran dane û destnîşan kir ku divê Kurdekî azad û civakek azad bê avakirin. Şadiye Manap bal kişand ser girîngiya bîranînên kesên jiyana xwe ji dest dane û têkiliya ku bi malbatên wan re hatiye danîn, da xuyakirin ku divê armancên şehîdan werin pêkanîn û anî ziman ku divê têkoşîna malbat û xizmên wan berdewam bike.
‘Em ê armancên wan pêk bînin’
Hevserokê Giştî yê DEM Partiyê Tuncer Bakirhan jî di axaftina xwe de sersaxî ji malbatên şehîdan re xwest û wiha got: “Ez sersaxiyê malbatan dixwazim. Serê hemû gelê me sax be. Tiştê ku wan dixwest, azadîbûna gel bû. Ji ber vê yekê xwestin gel bi çand û hunera xwe de bi awayekî azad bijî.”
Tuncer Bakirhan diyar kir ku ew ê armancên kesên jiyana xwe ji dest dane ji bîr nekin û axaftina xwe wiha bi dawî kir: “Em ê jiyaneke azad, çand û hunereke azad ji bo gelê xwe bînin.Em ê armanca wan veguherînin rastiyê. Ji ber ku wan ji bo aştî û jiyaneke bi rûmet tekoşîn da.”
Mewlûd xwendina diayan û dayîna xwarinê bi dawî bû.
