Bi pêşengiya MEBYA-DERê bi girseyî serdana şîna gerîlayê HPGê Çiya Farqîn hate kirin û di şînê de gotin: “Hebûna wan weke ku tovek li nava axê bê avêtin e, em wî awayî şên bûne.”
Bi pêşengiya Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirine (MEBYA-DER), gundê Etşa yê navçeya Farqînê ya Amedê serdana şîna gerîlayê HPGê Çiya Farqîn (Hacî Başaran) ku di 25ê Adara 2018an de li Heftanînê jiyana xwe ji dest dabû kirin. Rêveberên MEBYA-DERê, DEM Partiyê, DBPê yên navend û navçeyê, MED-TUHAD-FED, TUHAY-DER, Dayîkên Aştiyê, Aktîvîstên TJAyê, endamên Meclisa Ciwanan a DEM Partiyê, Hevşaredarên navçeyê, gelek nûner û endamên rêxistinên sivîl, beşdarî şînê bûn. Girseya ku ber bi mala şînê ve meşiya dirûşmeya “şehîd namirin” berz kirin. Piştre girse derbasî hundur bû ûji bo cangoriyên şoreşê deqeyekî rêz girt û piştî rêzgirtinê dîsa dirûşmeya “şehîd namirin” berz kir.
‘Wan barê sivik ji bo me hişt’
Rêvebera MEBYA-DERê Samiya Kutay di şînê de axivî û got: “Em ji malbata xwe re sersaxiyê dixwazin. Serê gelê Kurdên bi rûmet û birêz Abdulah Ocalan sax be. Şehîdên me rûmeta me ne, em bi wan serbilind in. Rêya ku wan vekiriye, em ê wê rêyê bişopînin. Wan barê sivik ji me re hişt. Heta em sax bin em ê xeyalên wan bi cih bînin.”
‘Îro hemû cîhan qala Kurdan dike’
Apê gerîlayê HPGê Çiya Farqîn, Hasan Başaran di şîna biraziyê xwe de axivî û got: “Em van lehengên ku canê xwe ji dest dane bibîr tînin, em bi wan serbilind in. Ev rê rêya şeref û rûmetê ye, em gelek pê kêfxweş in. Kes nikare tiştekî çewt ji wan re bêje. Heta ku em li ser şopa wan bin em ê hertim bi wan serbilind bin. Gelek ji me nizanin ku cenazeyên zarokên wan li ku derê ne. Navê me hatibû tunekirin, lê saya wan îro navê me li cîhanê belav bûye. Hebûna wan weke ku tovek li nava axê bê avêtin e, em wî awayî şên bûne. Hemû jî bi saya van hevalên me yên di zindanan de û di serî de saya Rêber Apo ye. Bi 6-7 kesan dest pê kirin, îro bûne bi milyonan. Îro hemû cîhan qala Kurdan dike.”
