Wan-Şaxa MEBYA-DERê ya Wanê û Înîsiyatîfa Rêzgirtina ji Miriyan re, îfadeyên dij exlaqî û mirovî yên ji bo cenazeyê endama PKKê Dîlan Oklu hatine bikaranîn bi tundî şermezar kirin û daxuyandin ku dê her tim li miriyên xwe xwedî derkevin û rûmeta wan biparêzin.
Şaxa MEBYA-DERê ya Wanê û Însiyatîfa Rêzgirtina ji Miriyan re têkildarî heqareta li dijî cenazeyê endama PKKê Gulistan Ûnver, li Qada Bajêr a Wanê daxuyaniyek da. Hevseroka Partiya Herêmên Demokratik a Wanê Gonul Ûzûnay, Parlementerê DEM Partiyê yê Wanê Zulkuf Ûçar, Dayikên Aştiyê, endamên saziyên sivîl ên civakî tev li daxuyaniyê bûn. Di daxûyaniyê de pankarta, “Rêya aştiyê rêzgirtina ji miriyan re derbas dibe” hate vekirin û dirûşmeya, “Şehid namirin” hate berz kirin. Li ser navê Înîsiyatîfê Gulîstan Ûnver daxuyanî xwend.
‘Avakirina aştiyê bi hurmeta ji bo mirî û zindiayan pêkan e’
Gulistan Unver diyar kir ku li dijî miriyan bi kar anîna zimanê heqaretê li dijî nirxên mirovahiyê ye û wiha got: “Bikaranîna vê îfadeyê, her wekî ku li dijî nirxên exlaqî yên herî kêm ên mirovahiyê ye, ji aliyê qanûnî ve jî li dijî qaîdeyên nivîsên fermî ye. Her wiha li dijî hiqûqa navxweyî û peyman û belgeyên navneteweyî yên ku dewleta Tirkiyeyê aliyekî wan e, ye. Lê belê, ev mijar nikare tenê wekî mijareke hiqûqî bê nirxandin. Di demeke ku li Tirkiyeyê pêvajoya çareserkirina pevçûnan di rojevê de ye de, zimanê ku li hemberî miriyên di pevçûnan de jiyana xwe ji dest dane tê bikaranîn, ji aliyê siyasî ve jî nayê qebûlkirin. Avakirina aştiyê tenê wê demê pêkan e ku em karibin bi rengekî adil ji bo zindî û miriyan, ji bo êşên hatine kişandin û canên windabûyî xemgîn bibin û her kes karibe şîna xwe bi rûmet bigire.”
‘Em ê rûmeta miriyên xwe biparêzin’
Li ser mijarê Gulistan Ûnver da zanîn ku dê her tim li miriyên xwe xwedî derkevin û rûmeta wan biparêzin. Ûnver axaftina xwe wiha bi dawî kir: “Em careke din diyar dikin ku em vê îfadeya şermezariyê qebûl nakin. Em dê xwedî li miriyên xwe derkevin, rûmeta wan biparêzin û ji bo miriyan daxwaza rêz û edaletê bidomînin. Em dê daxwaza rêzgirtin û edaletê ya ji bo miriyên xwe, wekî daxwaza herî bingehîn a çareseriya pevçûnan, ya her cure baweriyên olî û ya perspektîfeke sekuler biparêzin.”
Çi bibû?
Endama PKKê Dîlan Oklu di 16ê Hezîrana 2024an de jiyana xwe ji dest dabû. Malbata wê di Tîrmeha 2024an de agahiya mirina wê girtibû û li bajarê lê ji dayîk bûyî Wanê şîn danîbû. Derbarê siyasetmedarên ku beşdarî şînê bibûn de lêpirsîn hatibû destpêkirin. Di encama lêpirsînê de, li Dadgeha Cezayê Giran a 2yemîn a Wanê doz hatibû vekirin. Di çarçoveya darizandinê de, wêneyê CDyeke şikestî li rapora pispor hatiye zêdekirin û li ser CDyê peyva “leş” hatiye nivîsandin. Li ser vê rewşê malbat, parêzer û siyasetmedarên dihatin darizandin nerazîbûn nişan dabûn.
