Hevserokê Giştî yê DBPê Keskîn Bayindir bertek nîşanî astengkirina Çapemeniya Azad da û got ku ev pêkanînên BTKyê nayên qebûlkirin.
Hevserokê Giştî yê Partiya Herêmên Demokratîk (DBP) Keskîn Bayindir li ser hesabê xwe yê Xê bertek nîşanî biryara BTKyê ya astengkirina malper û hesabên Xê yên Azadiya Welat, Ajansa Welat, Nûmedya24 û Ajansa Berûyê da.
‘Mafê gel ê stendina agahiyên zimanê zikmakî tê astengkirin’
Keskîn Bayindir di parvekirina xwe de destnîşan kir ku di serdemek aştiya civakî û dahatûyek demokratîk tê axaftin ev biryarên li ser Çapemeniya Azad nayên qebûlkirin û wiha got: “Ji aliyekî qala demokratîkbûyînê tê kirin û ji aliyê din ve mafê gel ê stendina nûçeyên bi zimanê dayikê tê astengkirin, ev yek nakokiyek gelekî muhîm e.”
‘Astengkirina Çapemeniya Azad pêşî li çareseriyê digire’
Keskîn Bayindir di parvekirina xwe de diyar kir ku bi taybetî mudaxileya li ser Çapemeniya Azad zerarê dide çareseriya demokratîk û ev yek anî ziman: “Ev mudaxileya li ser Çapemeniya Azad pêşî li lêgerîna çareseriya demokratîk digire. Bîrdoziya azadiya çapemeniyê tune dihesibîne û astengiyê ji bo zimanê zikmakî derdixîne û ev yek xizmetê ji bo aştiyê û demokrasiyê nake.”
Keskîn Bayindir herî dawî bang kir ku astengiya li ser çapemeniyê were rakirin û dawî li van pêkanînên li dijî demokrasiyê were anîn.
