Hevserokê Giştî yê DBPê Keskin Bayindir di civîna gel a li navçeya Şehîdkamilê de axivî û diyar kir ku pêvajoya li pêşiya wan ronî ye û got: “Li pêşiya me aştiyeke birûmet û azadî heye.”
Partiya Herêmên Demokratîk (DBP) di çarçoveya rêzeçalakiyên xwe yên bi dirûşma “Em aştiyê bi gelan re ava dikin” de, li navenda Dîlokê civîneke girseyî ya geş mîna pîrozbahiyê li dar xist. Civîn li Parka Trafîkê ya li navçeya Şehîdkamilê ya Dîlokê bi tevlêbûna Hevserokê Giştî yê DBPê Keskîn Bayindir û bi sedan welatiyan pêk hat.
‘Gelê Kurd tofan li pey xwe hişt’
Keskîn Bayindir beriya axaftinê tevli govendê bû. Piştî pîrozbahiyê Bayindir bal kişand ser Pêvajoya Aştî û Civaka Demokratîk û bi bîr xist ku sal û nîvek li pey vê pêvajoyê maye. Bayindir wiha got: “Em hewl didin ku li Kurdistan û Tirkiyeyê meseleya Kurd ne bi çek, şer û dijminatiyê, lê bi diyalog û muzakereyê çareser bikin. Gelê Kurd di nav tofan, zilm û zextan re derbas bû, lê tu carî serî netewand û çok danenî. Gelê Kurd tofan li pey xwe hişt. Ji niha û pê ve pêşiya me ronî ye. Li pêşiya me aştiyeke birûmet û azadî heye.”
Bayindir bang li dewletê kir
Keskîn Bayindir di berdewamiya axaftina xwe de bang li dewletê kir û destnîşan kir ku heke niyeteke xirab hebe, gelê Kurd vê yekê qebûl nake. Bayindir daxwazên gel wiha bi rêz kirin: “Divê di nav van zagonan de azadiya fîzîkî ya Birêz Ocalan teqez hebe. Divê deriyên zindanan werin vekirin û hemû girtiyên me serbest werin berdan. Divê dozên li ser kesên ku doz li wan hatine vekirin û neçar mane biçin sirgûnê werin betalkirin. Her wiha divê qeyûmên ku li ser vîna gelê Kurd hatine tayînkirin, werin vekişandin. Divê şert û mercên vegera şervanên azadiyê werin dabînkirin.”
Civîna gel bi dirûşmeyên “Bijî Serok Apo” û “Jin, jiyan, azadî” bi dawî bû.
