Serokê Giştî yê Partiya Tevgera Neteweperwer (MHP) Devlet Bahçelî diyar kir ku divê êdî bersiva gavên Rêberê Gelê Kurd Abdullah Ocalan û DEM Partiyê bê dayîn û di çarçoveya mafê hêviyê de Abdullah Ocalan azad bibe. Bahçelî xwest ku Ahmet Turk û Ahmet Ozer vegerin ser meqamê xwe û Selahattîn Demîrtaş jî bê berdan. Bahçelî li aliyekê êrişî YPGê kir û li aliyê din jî jî aciziya xwe ji bo piştgiriya gelê Kurd a Rojava anî ziman.
Bahçelî di civîna koma partiya xwe de derbarê Pêvajoya Aştî û Civaka Demokratîk de daxuyaniyên girîng dan. Bahçelî di axaftina xwe de balkişand ser gavên Rêberê Gelê Kurd Abdullah Ocalan avêtine û wiha axivî: “Heta ku Anatoliya bigihe aramiyê, Ocalan bigihîje hêviyê, her du Ahmet jî vegerin meqamê xwe û Demîrtaş vegere mala xwe, biryara me zelal e.” Bahçelî pirsa, “Serokê Damezirîner ê PKKê ji 27ê Sibata 2025an ve li ser hemû sozên ku dabûn sekinî?” kir û bersiva, “Belê sekinî” da. Bahçelî bi pirsên, “Rêxisti fesih kir û çek şewitandin?, Ev ferman ji hêla hemû pêkhateyên PKKê ve hate bicihanîn?” û bersivên, “Belê ev hemû pêk hatin” domand. Bahçelî banga avêtina gavên bibin bersiva biryarên Ocalan heta niha dayîn, kir.
Êrişî YPGê kir
Bahçelî di daxuyaniya xwe de bal kişand ser rûdanên li Sûriyeyê û êrişî YPGê kir. Bahçelî ev angaştên bêbinî yên derbarê Rojavayê Kurdistanê û YPGê de anîn ziman: “Hewldana veguhestina rûdanên Sûriyeyê ji bo Tirkiyeyê û provokekirina birayên me yên Kurd bi ti awayî ne bi niyeta baş e. Anîna cem hev a birayên me yên Kurd û rêxistina YPGyê xefleteke mezin e. Li Sûriyeyê paradîgmayeke nû û avadaniyek nû çêbûye. Ev rewş armanceke ku dihat payîn e.”
Got ‘Kurd em in’ lê ji piştgiriya Rojava aciz bû
Bahçelî derbirî ku li Sûriyê derfetek çêbûye ku Ereb, Kurd, Tirkmen û gelên din di nav yekîtî û biratiyê de bijîn. Her wiha Bahçelî li aliyekê behsa biratiya Kurdan kir û li aliyê din jî piştgiriya gelê Kurd a ji bo Rojavayê Kurdistanê û şermezarkirina li dijî çeteyên cîhadîst aciziya xwe anî ziman. Bahçelî ev angaşt vegotin: “Yên ku nefretê diçînin dê bixesirin, yên ku fitneyê derdixin dê bixesirin, yên ku dixwazin biratiya Tirk û Kurdan xera bikin dê bixesirin. Tirk yên me ne, Kurd yên me ne. Miletê Kurd em bi xwe ne û em hemû ne.”
Bahçelî di dawiya axaftina xwe de îdia kir ku heta mafên mirovan û azadî bi temamî werin bicihkirin, ew dê têkoşîna xwe bidomînin.
