Serokê Giştî yê MHPê Devlet Bahçelî derbarê qanûna çarçoveyî û mafê heviyê yê Rêberê Gelê Kurd Abdullah Ocalan de diyar kir ku divê mafê heviyê ji bo Abdullah Ocalan jî were bicihanîn.
Serokê Giştî yê MHPê Devlet Bahçelî derbarê pêvajoya Aştî û Civaka Demokratîk û qanûna çarçoveyî ji Gerînendeyê Giştî yê Ajansa Nûçeyan a Millet re axivî. Bahçelî derbarê pêşnûmeya qanûna çarçoveyî û îmzekirinû pêşnûmeyê de diyar kir ku ew îmze tê wateya pêkanîna biratiya hezaran salan û got ku 86 milyon welatî û gelên Rojhilata Navîn dê sûdê jê werbigirin.
Bahçelî da zanîn ku ew bi Hevserokê Giştî yê HDPê yê berê Selahattîn Demirtaş ku li Girtîgeha Edirne girtî ye re bi rêya parêzeran di pêwendiyê de ye û bi Demirtaş re têkiliyek wî baş heye. Her wiha Bahçelî li ser daxuyaniyên berê jî careke din destnîşan kir ku divê Demirtaş vegere mala xwe, Ahmet Turk û Ahmet Ozer ku li şûna qeyim hatine tayînkirin vegerin ser karê xwe û xwest Rêberê Gelê Kurd Abdullah Ocalan jî ji mafê heviyê sûdê werbigire.
Bahçelî destnîşan kir ku armanca wan ew ê ku aramî li Tirkiye û herêmê pêk were.
