Amed – Endamên Desteya Şêwreya Bilind a Amedsporê Abdulkadîr Guleç û Sorgul Aytek nerazîbûn nîşanî cezayên vê dawiyê li Amedsporê hatine birîn dan û gotin: “Amedspor ne tenê tîmeke sporê ye, nûnertiya nasnameyeke civakî dike û biryarên federasyonê bêhiqûqî ye.”
Amedsporê di 23yê Çileyê de, li ser hesabên xwe yên medyaya civakî vîdeoyek e ku tê de keçikek ciwan li hundirê stadyumê porê xwe dihûnîne parve kir. Vîdeoya navborî bi boneya 25ê Mijdarê Roja Navneteweyî ya Têkoşîna Li Dijî Tundiya Li Ser Jinan, hatibû amadekirin. Federasyona Futbolê ya Tirkiyeyê (TFF), ji ber vê vîdyoya ku berê hatibû weşandin û tu pirsgirêkeke hiqûqî jî dernexist pêşiya Amedsporê. Ji be ku ev vîdeo carek din ji bo balê bikişîne ser kampaniya hûnandina keziyan carek din parve kir. Ji ber vê yekê di 27ê Çileyê de Amedspor sewqî Lijneya Dîsîplînê ya Futbolê ya Profesyonel (PFDK) kir. PFDKyê bi hinceta ‘daxuyaniyên ku rûmeta futbol û saziyên wê xira dikin û propagandaya îdeolojîk’ dike 802.500 TL cezaya pereyan li Amedsporê birî û her wiha 15 roj cezaya mahrûmiyeta mafan da Serokê Klûbê Nahît Eren.
Endamên tîma Amedsporê û gelek nûnerên saziyên sivîl ji bo vê cezakirinê protesto bikin duh li avahiya Cemiyeta Rojnamegeran a Başûrrojhilatê (GGC) daxuyanî dan çapemeniyê. Endamên Desteya Şêwreya Bilind a Amedsporê Abdulkadîr Guleç û Sorgul Aytek jî ku tev li daxuyaniyê bûn, ji ajansa me re axivîn û nerazîbûn nîşanî birîna ceza dan.
‘Werziş amûra aşitiyê ye, ne ya tundiyê’
Endamê Desteya Şêwreya Bilind a Amedsporê û Serokê Baroya Amedê Abdulkadîr Guleç bal kişand ser nasnameya klûbê û helwesta Federasyona Futbolê û wiha got: “Amedspor ne tenê tîmeke werzişê ye, Amedspor xwedî nasnameyekê ye. Lê mixabin, di qada werzişê de em dibînin ku hem li hemberî tundiyê, hem jî li hemberî holîganîzma ku di statuyan de tê meşandin, helwesteke cuda tê nîşandan.”
Abdulkadîr Guleç diyar kir ku spor di esasê xwe de divê bibe pira biratî û aştiyê, lê li Tirkiyeyê statuyên werzişê veguherîne qadên holîganîzm û tundiyê û wiha berdewam kir:“Werziş divê bibe amûreke aştiyê, biratiyê û lihevhatinê. Lê belê tiştên ku li Tirkiyeyê diqewimin, bi taybetî li dijî mirovahiyê ne û bêsazûmanî ne. Ev cezayên ku di dema dawî de hatine birîn, mînakên vê yekê ne. Di vîdeoyê de tê dîtin ku alîgirekî Amedê tenê porê xwe dihûne; gelo hunandina por çawa wekî sûcekî tê qebûlkirin?”
‘Federasyon nasnameya Amedsporê dike hedef’
Abdulkadîr Guleç di berdewamiya axaftina xwe de derbarê cezayê ku ji ber hûnandina porê alîgirekê hate birîn, nerazîbûn nîşan da û wiha axivî: “Mirov nikare vê yekê bi aqil û mantiqê rave bike. Ev nîşandide ku armanca federasyonê ya sereke Amedspor bixwe ye û dixwazin nirx û nasnameya wê bikin hedef. Ez wiha şîrove dikim ku ev bangawaziyên hatine kirin, li ser kesên ev biryar dane, bandorek çêkiriye.”
Abdulkadir Guleç di dawiya axaftina xwe de piştgiriya xwe ya ji bo tîma Amedsporê anî ziman û wiha got: “Em wekî hemû saziyên sivîl ên Amedê û Koordinasyona Îstîşareyê, em ê li pişt Amedsporê bin. Em ê vî cezayî bidin, lê em bang li kesên ku ev biryar dane dikin û dibêjin; Ev biryareke neheq û nehiqûqî ye. Divê ev ceza tavilê bê betalkirin.”
‘Amedspor refleksa gelê Kurd e’
Endama Desteya Şêwreya Bilind a Amedsporê û Endama Meclîsa Jinan a Amedsporê Sorgul Aytek jî bal kişand ser perspektîfa zayendî ya klûbê û got: “Amedspor bi xwe, bi nêrîna jinan, ji ber wê yekê her tim li dijî tundiya li ser jinan e. Ev dîmena ku tê hedefgirtin ji bo roja tundiya li ser jinan, ji bo têkoşîna roja jinan a cîhanê, di 23yê Mijdara 2025an de me parve kiribû. Rastî îro daxuyaniya me jî li ser wê mijarê bû. Em şermezar dikin ji bo vê biryarê, ji ber ku ev biryar ne cihê girtinê bû an tiştekî din bû. Ji ber ku tundiya li ser jinê şermezar kirîbûn û bertekek bû. Ji ber wê yekê Amedspor vê parve kir.”
Sorgul Aytek girîngiya Amedsporê ya di nav civakê de bi van gotinan pênase kir: “Çend sal e ji bo her mijara jinan derkeve, nêrîna Amedsporê naguhere. Amedspor ji bo mafên mirovan, ji bo mafên jinan, ji bo mafên zarokan, ji bo mafên ciwanan her tim bertek nîşan dide. Spor ne tenê di sehayê de gog lîstin e. Rastî bersivek e û Amedspor bersiva gelê Kurd e, refleksa gelê Kurd e.”
