Li navçeyên Nisêbîn û Artûklûyê welatî li dijî êrîşên li ser Rojava daketin kolanan û çalakiya deng derxistinê li dar xistin. Welatiyan her wiha dirûşma “Bijî Berxwedana Rojava” berz kirin.
Li navçeyên Mêrdînê çalakiyên li dijî êrîşên ser Rojava berdewam dikin. Li navçeya Nisêbînê bi pêşengiya Platforma Saziyên Demokratîk ji navenda navçeyê bi wesayîtan konvoy hate çêkirin û çalakiya deng derxistinê hat lidarxistin. Piştî ku konvoy gihîşt taxa Firatê girseyê agir pêxist û ciwanan fîşekên hewayî teqandin. Girseya ku piranî ji jin û ciwanan pêk dihat li dora agir kom bû û dirûşmeyên “Bijî berxwedana Rojava” , “Jin Jiyan Azadî” , “Bijî berxwedana Hesekê”, “Hesekê dê ji DAIŞê re bibe goristan” û “Bijî Serok Apo” berz kir.
Her wiha jinan, li dijî keziya şervaneke jin a ku ji aliyê çeteyê HTŞê ve hat birîn, li dora agir kom bûn û porê hevdû hûnandin. Di çalakiyê de carekedin peyama xwedîderketina Rojava derket pêş.
Her wiha li taxa Firatê jinan bi qûşxaneyan daketin kolanan, çalakiya deng derxistinê li dar xistin û dirûşmeyên “Bijî berxwedana Rojava” û “Jin Jiyan Azadî” berz kirin.
Artûklû
Li navçeya Artûklûyê jî li gelek taxan çalakiya deng derxistinê hat lidarxistin. Welatiyan bi qûşxaneyên ku girtin destên xwe derketin kolanan, bi dirûşma “Bijî Berxwedana Rojava” piştgirî dan Rojava.
