Meclîsa Ziman a Konseya Bajêr a Amedê civîna xwe ya 2yemîn a asayî li dar xist û di civînê de wiha hate gotin: “Em ê li her derê xebatên ziman bimeşînin û her dem zimanê Kurdî biparêzin.”
Meclîsa Ziman a Konseya Bajêr a Amedê civîna xwe ya 2yemîn a asayî li ÇandAmedê ya li dar xist. Gelek mamoste û rêveberên saziyên ziman, hevşaredarên navçeyên Amedê û gelek nûnerên saziyên sivîl tev li civînê bûn. Di civînê de ji bo parastina ziman nîqaş hatin kirin.
Di dîwana civînê de Rêveberê Baroya Amedê Muslum Dalar, Hevberdevkê Meclîsa Ziman a Kirmanckî Denîz Gunduz, Endamê Meclîsa Ziman Jêhat Rojhilat, Hevberdevka Meclîsa Ziman a Konseya Bajêr a Amedê Leylana Sidiq cih girtin.
Civînê bi xwendina rêziknameya xebat û pêşkeşkirina dengdanê dest pê kir. Piştre plana xebatên Meclîsa Ziman hate nirxandin û ev yek pêşkêşî dengdanê hate kirin. Endamên Meclîsa Ziman û beşdaran di civînê de li ser pêşketin û parastina zimanê Kurdî nîqaş û axaftinan kirin. Her wiha beşdaran diyar kir ku ew ê li her derê xebatên ziman bimeşînin û her dem zimanê Kurdî biparêzin.
