Bi pêşengiya TJAyê li Êlihê êrişên li ser taxên Şêxmexsûd Eşrefiyê yên Helebê hate şermezarkirin û di daxuyaniyê de hate gotin: ” Em ê tu hewldanek ji bo tunekirina berxwedana xeta rizgariya jinan û jiholêrakirina destkeftiyên demokratîk ên li Rojava û îradeya jiyana bi hev re qebûl nekin.”
Bi pêşengiya Tevgera Jinên Azad (TJA) li ber Bîrdariya Mafên Mirovan a li serê Cadeya Gulistanê ya Êlihe daxuyanî hate dayîn û meş hate lidarxistin. Rêveberên DEM Partiyê, Partiya Herêmên Demokratîk (DBP), MEBYA-DER, TUAY-DER, TOMMOB, ARÎ-DER, Navenda Çandê ya Baharê (BKM), Egîtîm Sen, Baroya Êlihê û gelek endamên saziyên civaka sivîl beşdarî çalakiyê bûn. Metna daxuyaniyê ji aliyê Aktîvîsta TJAyê Meral Kaplan ve hate xwendin.
Girseya ku li vir amade bû dirûşmeyên “Bijî Serok Apo”, “Bijî berxwedana Rojava”, “Rojava ya me ye rûmeta me ye”, “Şehîd namirin”, “Rojava Rojhilate Kurdistan yek welat e”, “Jin Jiyan Azadî” û “Rojava xeta me ya sor e” hatin berzkirin.
Metna Daxuyaniyê bi vî rengî ye:
“Manîfestoya Civaka Demokratîk a ku li Rojava bi felsefeya ‘Jin Jiyan Azadî’ derket holê bûye alternatîfek. Çeteyên DAIŞê, ku li dijî civak û mirovahiyê sûc kirine û komkujî pêk anîne, rasterast wan tê kirin. Cenazeyê şervaneke jin a ji Hêzên Ewlekariya Hundirîn rastî muameleyeke nemirovane hat. Ev ne cara yekem e ku nêzîkatiyeke bi vî rengî tê dîtin. Jin û gelê Rojava, li hemberî van rêbazên hovane, qet netirsiyane û her tim îradeya xwe ya avakirina jiyaneke azad xurt kirine. Jinên ku Şoreşa Rojava afirandine, li ser şopa Arîn Mîrkan, Barîn Kobanî û Amara Renas li ber xwe dane û berxwedaneke destanî li taxên Şêx Meqsûd û Eşrefiye didomînin. Ew ê li dijî hişmendiya HTŞ û SMO ya girêdayî DAIŞê gavekê ji paş ve neavêjin. Çeteyan, li hemberî îradeya bêşikest a vê berxwedanê, bi îşkencekirina cenazeyê hevaleke jin li Şêx Meqsûd, sûcekî din ê li dijî mirovahiyê kirin e.
Êriş li dijî jiyana demokratîk pêk hatin
Sûcên şer ên ku ji aliyê Çeteyên HTŞ û DAIŞ bi heman rengî ve hatine kirin, tundiya sîstematîk a li dijî jinan û komkujiyên li dijî gelan e. Çeteyên DAIŞ û HTŞê li ber çavên tevahiya cîhanê derketine holê û sûcê şer dike. Bi gotinên “terorîzmê” sûcdarkirina kesên ku xwe li dijî van çeteyan diparêzin û bi hinceta “têkoşîna li dijî terorîzmê” bombebarankirina taxên Kurdan rewakirin nayê qebûlkirin. Ev helwest ne polîtîkayeke ewlehiyê ye. Lê hewldanek e ji bo tepisandina têkoşîna azadiya jinan û şikandina vîna berxwedanê ya gel e. Êrîşên li ser taxên Şêxmexsûd û Eşrefiyê sivîl, jin, zarok û jiyana demokratîk hedef digir e. Ev êrîş ewlehiyê misoger nakin, şer kûrtir dikin. Armanc ew e ku hebûna civakî ya jinan, îradeya hevpar a pêşeroja wan a azad ji holê rakin.
Em ê axa xwe û gelê xwe û jiyana azad biparêzin
Em weke Tevgera Jinên Azad, careke din teqez dikin ku Têkoşîna me ya li dijî DAIŞ, HTŞ, dewlet û bîrdoziyên ku wan afirandine dê berdewam bike. Hemû dewletên mîlîtarîst, nijadperest û şovenîst ên heyî li dijî berxwedana rêxistinkirî ya jinên Kurd mehkûmî windakirinê ne. Em ê tu hewldanek ji bo tunekirina berxwedana ku li ser xeta rizgariya jinan, destkeftiyên demokratîk ên li Rojava û îradeya jiyan a bi hev re ya gelan radibe qebûl nakin. Em ê parastina ax, gelê xwe û jiyana azad a jinan bidomînin. Jin jiyan azadî.”
Meş hate lidarxistin
Piştî daxuyaniyê girse ji serê Cadeya Gulistanê heta ber avahiya DEM Partiyê ya Bajêr meş li dar xist. Di meşê de dirûşmên dilsoziya bi Rojava re hatin berzkirin. Piştî meşê çalakî bi dawî bû.
