Amedsporê li dijî heqaret û çêrên li dijî Leyla Zanayê hatin kirin, biryar da ku di maça Igdirsporê de alîgirên jin dê belaş derbasî stadê bibin.
Maça Bursaspor-Somasporê di 16ê Kanûnê de li Somasporê pêç hat. Di maçê de alîgirên nijadperest ên Bursasporê siyasetmedara Kurd Leyla Zana kirin hedef û çêr û heqaret lê kirin. Bertekên li dijî van çêr û heqaretan didomin. Li gorî nûçeya Ajansa Mezopotamyayê; Amedsporê jî weke bertekeke li dijî van çêran, biryar da ku di maça hefteya pêş me de alîgirên jin belaş bên li stadê li maçê temaşe bikin. Seroka Duyemîn a Amedsporê Şeyda Arslan diyar kir ku êrişên nijadperest û zayendperest ên li dijî Leyla Zana, êrişeke li dijî nasnameya jinan e û divê trîbûn û fealiyetên sportîf nebin amûrên gotinên nijadpereset, cihêkar û gotinên zayendperest.
Alîgirên jin dê belaş derbasî stadê bibin
Şeyda Arslantaş da zanîn ku li dijî êrişên nijqadperest û zayendperest ên li dijî Leyla Zana, wan biryar daye ku hefteya pêşiya me maça Amedspor-Igdirsporê ya di 28ê Kanûnê de ji bo alîgirên jin bêpere be û got: “Ji ber ku em dixwazin li dijî vê êrişê bêhtir jinan di trîbûnan de bibînin. Ji bo vê tenê tişta ku dikarin bikin ev e, bila biçin navendên jinan ên heyî û hejmara nasnameyên xwe bidin wan. Em jî dê li ser van hejmarên nasnameyan bilêtên belaş bidin wan. Em ê bi zêdekirina hejmara jinan re bersiveke baş bidin wan. Dê têkoşîna me ya li dijî êrişan bidome.”
Maça dawiya dewrê li Amedê ye
Hefteya pêşiya me roja 28ê Kanûnê dê Amedspor û Igdirspor di hefteya 19emîn ango hefteya dawî ya dewreya Lîga 1emîn de li Stada Tahîr Elçî ya Amedê bên hemberî hev. Piştî vê maçê dê dewreya yekemîn a lîgê bi dawî bibe.
