Wan – Endamê Komîteya Amdekar a Komxebata “Stratejî û Polîtîkayên Têkoşîna Ji Bo Zimanê Kurdî” Dogan Şenses bal kişand ser armanca komxebatê û got: “Em bang li hemû gelê xwe dikin ku tev li vê komxebatê bibin û fikrên xwe bibêjin da ku zimanê me şên bibe.”
Saziyên Zimanê Kurdî û Platforma Saziyên Demokratîk, dê di 15 û 16ê Cotmehê de li Eywana Dawetê ya Ciraganê ya li navçeya Rêya Armûşê ya Wanê bi sernavê “Stratejî û Polîtîkayên Têkoşîna Ji Bo Zimanê Kurdî” komxebatekê li dar bixin. Dê di komxebata ku 2 rojan bidome de 8 mijar bên nîqaşkirin û hemû sazî, dezgeh û rêxistinên welatparêz ên li bakurê Kurdistanê û Tirkiyeyê tev li bibin. Wê her sazî û dezgeh, li ser pisporiya xwe mijarên xwe pêşkêş bikin û bi pirs û bersivên welatiyan jî dê ev mijar bên nîqaşkirin.
‘Aliyek vê pêvajoyê jî têkoşîna navxweyî ye’
Endamê Komîteya Amdekar a Komxebatê Dogan Şenses ku derbarê armanca komxebatê de agahî dan, bal kişand ser pêvajoya “Aştî û Civaka Demokratîk” û diyar kir ku ev saleke di vê pêvajoyê de zimanê Kurdî gelek tê nîqaşkirin. Dogan Şenses anî ziman ku aliyekê vê pêvajoyê jî têkoşîna navxweyî ye û got: “Me jî weke qada ziman xwest ku di mijarên navxweyî de xebateke wisa bikin û stratejî û polîtîkayên xwe yên li ser zimanê Kurdî zelal bikin û li gorî wê têkoşîna xwe ya ziman bidin meşandin.”
‘Dê 8 kom polîtîka û stratejiyên xwe bînin ziman’
Dogan Şenses anî ziman ku wan gazî hemû saziyên welatparêz kiriye û bi lêv kir ku ev sazî jî dê li gorî xebatên xwe polîtîkayên xwe yên derbarê zimanê Kurdî de diyar bikin û nîqaş bikin. Dogan Şenses destnîşan kir ku 8 kom dê di komxebatê de mijarên xwe pêşkêş bikin û wiha got: “Wê 15 û 16ê mehê komxebat bê lidarxistin û her roj dê 4 kom mijarên xwe pêşkêş bikin. Her wiha di nava her komê de jî pêkhateyên cuda hene û ew jî dê mijarên xwe di bin heman navî de pêşkêş bikin. Di dawiya komxebatê de dê mijara hiqûq û dîplomasî bê nîqaşkirin û li polîtîkayên wan bên guhdarîkirin.”
‘Divê her saziyeke Kurdan xwedî polîtîkaya ziman be’
Dogan Şenses bi bîr xist ku divê di vê pêvajoya “Aştî û Civaka Demokratîk” de her saziyeke Kurdan polîtîkaya xwe ya zimanê Kurdî hebe û wiha dawî li axaftina xwe anî: “Sazî, divê li gorî van polîtîka û stratejiyan têkoşîna xwe ji bo Kurdî bimeşîne. Heke ne wisa be, em nikarin zimanê xwe bidin pejirandin û em nikarin vê pêvajoyê jî bibine serî. Hetanî 20 sal beriya niha di nava gel de zimanê Kurdî serwer bû. Her çiqas polîtîkayên bişaftinê hebûn jî zimanê Kurdî di her qada jiyanê de hebû. Lê mixabin niha bişaftina navxweyî (otoasîmîlasyon) pêş ketiye, lewma divê em polîtîkayên xwe yên ji bo zimanê Kurdî diyar bikin da ku bikaribin têkoşînê bimeşînin. Heke em wisa nekin dê zimanê me ji destê me here, heke zimanê me ji destê me çû em jî dê ji serkeftinê dûr bikevin. Lewma, em bang li hemû gelê xwe dikin ku tev li vê komxebatê bibin û fikrên xwe bibêjin. Ziman yê gel e, werin zimanê xwe şên bikin, têkoşîna ji bo ziman pêş bixin.”
