Qurbaniyên Komkujiya 10ê Cotmehê yên Gara Enqereyê li Şirnexê hatin bîranîn û hat xwestin ku kujer werin dîtin.
Li Kolana Hunerê ya navçeya Cizîrê ya Şirnexê bi tevilbûna Parlementerên DEM Partiyê yên Şirnex Mehmet Zekî Îrmez û Newroz Ûysal Aslan, endam û rêveberên partiyên siyasî, saziyên civaka sivîl û gelek welatiyan, bi pêşengtiya Platforma Ked û Demokrasiyê daxuyanî hat dayîn.
Hevserokê Komeleya Mafên a Şaxa Şirnexê Şivan Sakman di daxuyaniyê de axivî û got ew 104 kesên di Komkujiya Gara Enqereyê hatine qetilkirin bi bîr tînin. Sakman diyar kir ku heya kujerên komkujiyê neyên darizandin û cezakirin ê têkoşîna wan a edaletê berdewam bike.
Piştre Parlamenter Ûysal Aslan kesên di komkujiyê de jiyana xwe ji de dayîn bi bîr anî û wiha axivî; “Komkujiya 5ê Hezîranê ya Amedê, ya Pirsûsê, ya Enqereyê bi destê DAIŞê û bi çavlêgirtina dewletê pêk hatin. Dewleta ku ew qas pesnê ewlehî stendina saziyên xwe dikir nexwest pêşiya van qetlîama bigire û heya îro nexwestiye kujeran jî darizîne. Îro pêvajoyek tê meşandin, ger ev pêvajo bi awayek serleftî temam bibe, wê demê em ê hesabê van qetlîaman bikarin bipirsin.”
Piştre ji aliyê Hevseroka Komeleya Mafê Mirovan Şaxa Şirnex Rûken Ustun ve daxuyanî hat xwendin û ji bo sekna dewletê ya li hember malbatên kesên komkujiyê de jiyana xwe ji dest dane çalakiya rûniştê pêk hat.
Çalakî bi dirûşma, ‘Şehîd namirin’ bi dawî bû.
