Wan – Zeviyên firingiyan ên li navçeya Payîzava têne çandin ji ber nexweşiyê, bi tonan di nava zeviyan de riziyan. Ji ber nexweşiya ku ji nişka ve derket holê, cotkaran hemû berhemên xwe di nava zeviyê de hiştin.
Li deşta navçeya Payîzava ya Wanê ji bo cotkariyê zeviyên gelek xêr û ber hene û niştecihên herêmê ji bo debara xwe çandiniya wan dikin. Gelê herêmê, firingî, îsot, garis, petêx, zebeş hwd. gelek cûre zerzewatan li vir diçînin. Hersal jî berhemeke baş kom dikin. Lê, îsal ji ber nexweşiyên “çilmisîna ji ber bakteriyan” û “antraknoz” zeviyan zirar dîtine û berhemên cotkaran di nava zeviyê de riziya ne û xerab
bûne.
Cotkar tînin ziman ku îsal nexweşî ketiye nava fêkiyên wan. Cotkarekî anî ziman ku wî nêzî 3 milyon lîre mesref li van zeviyan kiriye û niha hemû berhemên wî ji ber nexweşiyê xerab bûye. Malbata ku firingî û îsot çandiye, ji sedî 80ê berhemê wan ji ber nexweşiyê xera bû. Malbatê destnîşan kir ku nexweşî ji nişka ve derketiye û nekariye mudaxale bikin. Malbatê da zanîn ku kesên rayedar jî bi wan re eleqedar
nebûne û zirareke mezin dîtine.
Malbatê bertek nîşanî bihayên firingiyan jî da û destnîşan kir ku ew kîloya firingiyan 5 lîreyan difiroşin, lê di marketan de heta 30 lîreyan jî tê firotin. Malbata ku nerazîbûna xwe anî ziman, pirsî ku çima ji wan evqas erzan distînin û di marketan de evqas giran difiroşin? pirsî. Malbatê got ku gava nexweşî bi berheman dikeve, firingî û îsotên xeradibin dikin salçe, lê ji ber ku li herêmê fabrîkayên salçeyê jî nînin, wan hemû berhemên xwe di zeviyê de hiştiye.
