Cotkarên li Rihayê li dijî qutkrina ceyranê û pirsgirêka avdaniyê dest bi çalakiyê kirine gotin: “Av nagihîje zeviyên me. Heya çareseriyeke mayînde neyê dîtin em ê çalakiya xwe bidomînin.”
Li navçeyên Halîliye, Hewag û Cûrnê Reş ên Rihayê, ji ber DEPSAŞê ceyrana avdaniyê ya Cullap û Tatar Hoyuk biriye, cotkar nikarin li zeviyên xwe avdaniyê bikin. Cotkarên ji ber birîna ceyranê ketine rewşeke zor û zehmet duh li Xaçerêya Uçaksavêrê hatin cem hev bi daxwaza Walî re biaxivin heya li ber awayiha Walîtiya Rihayê meş li dar xistin. Parlamenterê Rihayê yê DEM Partiyê Ferît Şenyaşar jî piştgirî da cotkaran. Piştî meşê şandeyeke cotkaran bi Walî Hasan Şildak re hevdîtin pêk anîn. Şandeyê piştî hevdîtinê daxuyanî da û diyar kir ku Walî ji bo hevdîtinê bi wezaretê re bike 2-3 roj mohlet xwest.
Cotkaran destnîşan kiribû ku heya ew encameke erênî nestînin ew ê ji ber walîtiyê neçin. Piştî hevdîtina bi Walî re hatiye kirin 48 saetan av hate berdan lê belê cotkar dan zanîn ku di 48 saetan de avdanî çênebû û anîn ziman ku av nagihîje zeviyan. Bi ser vê yekê cotkaran xwest çalakiya girtina rê pêk bînin, lê polîsan destûr neda vê yekê û xwestin êrişî cotkaran bikin.
Cotkarên niharin li zeviyên xwe avdaniyê bikin hêj jî li ber Walîtiya Rihayê çalakiya xwe didomînin. Cotkar destnîşan kirin ku heya çareseriyeke mayînde neyê dîtin ew ê çalakiya xwe bidomînin.
