Cotkarên Pîrsûsê yên ku xwestin balê bikişînin ser bihabûna lêçûn û bihabûna çandiniyê, meş li dar xistin û bi traktoran çalakî pêk anîn. Di çalakiyê de hat destnîşankirin ku lêçûnên çandiniyê ji sedî 50 zêde bûne, lê bihayê berheman di binê lêçûnan de mane.
Li navçeya Pîrsûsê a Rihayê, cotkaran li dijî zêdebûna lêçûnên çandiniyê meşeke girseyî pêk anî. Meş bi pêşengiya DEM Partiyê ya Rihayê hat organîzekirin. Yekîtiya Avdanî û Muxtaran a GAPê (GAPSUMDER), Komeleya Ziraetê û Hilberîneran (ZUDER), Odeya Ziraetê ya Pîrsûsê û gelek cotkar beşdarî meşê bûn.
Cotkar li ser Rêya Ziyaretê ya li derveyî navçeyê, li benzînxaneya Şansalê civiyan û bi traktor, patoz û wesayîtên din ên çandiniyê ber bi navçeyê ve ketin rê. Cotkar bi lêdana qorneyan, heta qada navçeyê meşiyan. Di meşê de pankartên wekî “Eger cotkar hilberînê neke, pîşesazî jî nikare hilberîne. Welat di nav tariyê de dimîne”, “Ji cotkarên Pîrsûsê re edalet”, “Li ser her sifreya me xwêdana eniya cotkaran heye”, “Nan yê me ye, ax ya me ye, paşeroj a me ye” û “Çandinî hebe paşeroj heye” hatin hilgirtin.
‘Lêçûn qat bi qat zêde dibin’
Li ser navê cotkaran Bilal Zenan axivî û bal kişand ser rola çandiniyê û wiha got: “Çandinî êdî li cîhanê ne tenê çalakiyekî aborî ye, di heman demê de sektoreke stratejîk e. Ji ber ku nifûsa cîhanê bi lez zêde dibe lê erdên çandiniyê çol dibin û ji holê radibin. Welatên pêşketî ji bo çandiniyê piştgiriyên girîng didin, lê Mixabin li welatê me hikumet guh nade vê yekê. Bihayê gubre, mazot û dermanên çandiniyê her ku diçe qat bi qat zêde dibe.”
Nûnerê GAPSUMDERê Ramazan Bozdag jî bal kişand ser pirsgirêka avdaniyê û wiha axivî: “Li Pîrsûsê genim, ceh, garis û pembo tê çandin. Li vir bihayê avê yê ku ji bo avdaniyê tê wergirtin pişta cotkaran ditewîne. Pêwîst e ji sedî 60ê lêçûnên avdaniyê ji budceya giştî bê dabînkirin. Hilberîna enerjiyê divê bi pergalên nûjen be û bihayê avê li hemû yekîtiyên avdaniyê yên bajar bê wekhevkirin.”
‘Erdên çandiniyê nîvî bi nîvî kêm bûn’
Li ser navê ZUDERê Haluk Elmascan jî bal kişand ser kêmbûna qada çandiniyê û wiha got: “Asta ku em gihîştine li ber çavan e. Par 140 hezar donim pembo hatibû çandin, lê îsal tenê li ser 70 hezar donimî hate çandin. Ev wendahiyeke neteweyî ye. Ji bo welat û cotkarên me birîneke kûr e. Pirsgirêkeke din a girîng jî erdên ku di bin avê de mane ye. Niha 5 hezar donim erd veguhastiye golekê. Ji ber ku pergal nehatiye çêkirin erdên çandiniyê ji holê radibin. Divê ev pirsgirêk di demek zûtirîn de bê çareserkirin.”
‘Lêçûn ji sedî 50 zêde bûn’
Piştre Parlamenterê DEM Partiyê ê Rihayê Ferit Şenyaşar axivî û bang li desthilatê kir û wiha got: “Ji axa Mezopotamyayê ku yekem cureyên çandiniyê li ser hatine kirin, em li ser navê hemû cotkaran bang li desthilê dikin. Di 5 salên dawî de cotkarên Pîrsûsê û yên tevahiya Tirkiyeyê di karê cotkariyê de zerarê dikin. Dema ku bihayê mazotê li hemberî sala borî ji sedî 60 zêde bûye, bihayê berheman tenê ji sedî 22 zêde bûye. Lêçûnên cotkaran ji sedî 50 zêde bûne, lê dahat bi tevahî di binê lêçûnan de maye. Li çar aliyê welat 186 yekitiyên avdanê hene, lê bihayê herî bilind ê avê li Rihayê tê stendin.”
Daxuyanî bi berzkirina dirûşma “Em cotkar in, em mafdar in, em ê bi ser bikevin” bi dawî bû.
