Li ser otobana Îzmîr-Stenbolê, di encama li hevketina otobusek û barhilgirek de qezayek pêk hat. Di qezayê de 11 kesan jiyana xwe ji dest dan, yek ji wan giran bi giştî 27 kes jî birîndar bûn.
Qeza li navçeya Akhîsara ya Manisayê, dora saet 11:10an de li nêzî gişeyên Akhîsarê ya Otoyola Gebze-Orhangazî-Îzmîrê qewimî. Piştî agahdarkirinê, gelek tîmên ambûlans, îtfaîye û polîs çûn cihê bûyerê. Li gorî agahiyan, otobusa geştê ku ber bi navçeya Pamûkkale ya Denizliyê ve diçû, li xaçerêya Manîsa-Akhîsarê gava ku otobusê hewl daye paşve vegere, barhilgir ji paş ve lê daye.
11 kes mirin
Waliyê Manisayê Vahdettin Özkan piştî qezayê çû cihê bûyerê. Waliyê Manîsayê Ozkan di daxuyaniya xwe ya ji bo rojnamegeran de tespîtên yekem parve kirin û got: “Di qezayê de 11 welatiyên me jiyana xwe ji dest dan û 27 welatî jî birîndar bûn. Ji van birîndaran rewşa kesekî giran e (koda sor), 16 kes bi koda zer û 9 kes jî bi koda kesk sewqî nexweşxaneyan hatine kirin. Di bin koordînasyona Serdozgeriya Komarê de xebatên li cihê bûyerê berdewam dikin. Em dubare ji yên ku mirine re rehma Xwedê û ji birîndaran re jî şîfaya lezgîn dixwazin.”
Ji DEM Partiyê peyam
Partiya Wekhevî û Demokrasiyê ya Gelan (DEM Partî) jî derbarê qezayê de daxuyaniyek li ser hesabê xwe yê Xê belav kir. DEM Partiyê di daxuyaniya xwe de xemgîniya xwe anî ziman û bal kişand ser xemsariyan û ev yek got: “Em di qezaya trafîkê ya li Akhîsarê de ji 11 welatiyên me yên jiyana xwe ji dest dane re ji Xwedê rehmê, ji malbat û hezkiriyên wan re serxweşiyê û ji birîndaran re jî şîfaya lezgîn dixwazin. Ev ne qeder e, encama îhmalan e. Mafê veguhastina bi ewlehî mafekî mirovî ye; em bang li rayedaran dikin ku tedbîrên pêwîst bigirin.”
