Pêngava Bidawîkirina Darvekirinê ragihand ku xeterî heye cezayê darvekirinê yên li Pexşan Ezîzî, Werîşe Mûradî û Şerîfe Mihemedî hatiye birîn, bê pêkanîn.
Pêngava Bidawîkirina Darvekirinê li ser rewşa girtiyên jin ên siyasî Pexşan Ezîzî, Werîşe Mûradî û Şerîfe Mihemedî daxuyaniyek da.
Di daxuyaniyê de hate destnîşan kirin ku xeteriya darvekirina 15 girtiyên siyasî yên kurd û Îranê ku herî pêşçav Pexşan Ezîzî, Werîşe Mûradî û Şerîfe Mihemedî ne heye.
Hate diyarkirin ku cezayê darvekirinê nîşaneya tirs û lewaziya dîktatoriya serdest a li hemberî serhildanên girseyî, berxwedana çalakvan û şervanên azadiyê ye û ev hatiye gotin: “Îran dixwaze bi rêya darvekirinê û serkutkirinê hebûna xwe mîsoger bike.”
Di daxuyaniyê de daxwaz ji saziyên navneteweyî, Neteweyên Yekbûyî û çalakvan dikin ku li dijî darvekirinê bibin xwedî helwest.
Girtiyên siyasî yên bi navê Bêhrûz Îhsanî û Mehdî Hesen li Girtîgeha Qezaihsar li Kerac duh hatin darvekirin.
Mehdî Hesen sala 1976 hatiye dinê, bavê 2 zarokane. Îlona 2022yan li Zencan hate girtin. Bêhrûz Îhsan jî temenê wî 64 salî li Tahranê dijiya. Cotmeha 2022yan hate girtin û piştre bi sûcdariya siyasî hate darvekirin.
