Wan – Akademîsyena Zanîngeha Dûhokê Dr. Kazhal Fedakar ku ji bajarê Sînê yê rojhilatê Kurdistanê tev li Sempozyûma 2yemîn a “Sosyo-Polîtîkaya Ziman” bû, diyar kir ku hemû desthilat dixwazin zimanê xwe belav bikin û got: “Divê em parastina ziman bikin hinceta berxwedanê.”
Sempozyûma 2yemîn a “Sosyo-Polîtîkaya Ziman” a Şaxa Sendîkaya Kedkarên Zanist û Perwerdehiyê (Egîtîm Sen) a Wanê ku li Eywana Tahîr Elçî ya Baroya Wanê hat lidarxistin, piştî du rojan bi dawî bû. Sempozyûma ku têr û tije derbas bû gelek rewşenbîr û zimanhezên Kurd li hev civiyan û ji bo pêşxistina zimanê Kurdî gûftûgo kirin. Ji rojhilatê Kurdistanê jî akademîsyenên Kurd Dr. Kazhal Fedakar ku amademisyenê Zanîngeha Dûhokê ye tev li sempozyûmê bû û bi mijara xwe bal kişandin ser girîngiya parastina zimanê Kurdî.
‘Divê mirov li mala xwe dest pê bike’
Dr. Kazhal Fedakar ji bo ajansa me axivî û bal kişand ser têkiliya di nava netew û ziman de. Dr. Kazhal Fedakar kêfxweşiyên xwe yên ji bo xebata Egîtîm Senê diyar kir ku ziman beşekî nasnameya miletan e. Dr. Kazhal Fedakar da zanîn ku heke ziman, çand û hunera nebe milet jî nabin û got: “Ez wisa dibînim ku ji bo zimanê Kurdî tevgere baş heye û li Rojhilat jî eleqeya ji bo ziman gelekî baş bûye. Kesek heke li mala xwe Kurdî neaxive, li derên din jî naaxive. Lewma divê mirov li malê dest pê bike. Ez rexneyekê li Bakuriyan dikim, çima di malên xwe de Kurdî naaxivin? Sedema vê yekê ez jî nizanim, li Rojhilat ne wisa ye. Em hemû di malên xwe de Kurdî diaxivin û her wiha li Rojhilata di hemû qadan de Kurdî tê axaftin.”
‘Zimanê Kurdî ti caran namire’
Dr. Kazhal Fedakar bal kişand ser cudabûna parçeyên Kurdistan û bi lêv kir ku Başûr serbixwe ye û axaftina Kurdî heye, zanîngehên wan ên Kurdî hene. Dr. Kazhal Fedakar da zanîn ku li 3 parçeyên din divê xwe ji Erebî, Tirkî û Farisî rizgar bikin û wiha pê de çû: “Ez nabêjim ku hîn nebin, neçarî em ê hîn bibin ji xwe. Lê, divê fêrbûna van zimanan ji bo nehînbûna Kurdî nebe hincet. Tu dikarî gelek zimanan hîn bibî, lê divê zimanê te yê sereke hertim Kurdî be. Zarokek ku li malê Tirkî biaxive karesat e ji bo Kurdan. Heke mirov bi Kurdî nenivîsîne, nexwîne dê lawaz bibe û zimanê Kurdî li cîhanê zimanekî sereke ye. Mirin ji bo Kurdî nîne, Kurdî ti car namire, gelek diyalektîkên cûr be cûr ên Kurdî hene û dewlemend e.”
‘Parastina ziman erka me ye’
Dr. Kazhal Fedakar diyar kir ku hemû desthilat dixwazin zimanê xwe belav bikin û got ku li her çar parçeyên Kurdistanê jî ev tişt wisa ye. Dr. Kazhal Fedakar, destnîşan kir ku her desthilat siyaseta zimanê xwe dikin û wiha bi dawî kir: “Ev yek ji bo me divê bibe armanca berxwedanê ku em bikaribin Kurdî biparêzin. Bi rêyên wêje, nivîsîn û çalakiyên cûr be cûr em dikarin ji bo zimanê xwe bixebitin û ev yek erka me ya herî mezin e. Hêviya min ew e ku ew kursiyên li vir ji bo çalakiyên zimanê Kurdî her tim tije bibin û her kes ji Kurdîtî û Kurdayetiyê hez bike.”
