Hevseroka Desteya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed diyar kir ku dê di demekî herî kin de Konferansa Kurd dê were lidarxistin.
Di 16 û 17ê Nîsanê de Dîdara 9emîn a Silêmaniyê li Zanîngeha Amerîkî ya bajarê Silêmaniyeyê hat lidarxistin. Hevseroka Desteya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed jî tev li dîdarê bûbû. Îlham Ehmed têkildarî dîdarê ji ANHAyê re axivî.
Îlham Ehmed da zanîn ku di dîdarê de zêdetir li ser rewşa heyî ya jeosiyasî û siyaseta heyî, hevsengiyên heyî ya li herêmê û bandora wê li ser welatên wekî Sûriyeyê hatin nîqaşkirin. Îlham Ehmed anî ziman ku di dîdarê de teqezî li ser vê yekê hat kirin ku vegera li rewşa beriya 2011an ne mimkun e û wiha got: “Hinek nêrîn derketin ku banga sîstema nenavendî dikin. Hin din jî sîstema federalî ya ku piraniya sûriyeyiyan li ser wê lihev kirine, xwestin. Aşkere ye ku sîstema navendî ya hişk êdî vebijêrkeke mayînde nîn e.”
Bi domdarî Îlham Ehmed destnîşan kir ku avakirina sîstemeke nenavendî bûye pêwîstiyek û bi bîr xist ku ev sîstem derfetê dide gelê herêmê ku bi xwe xwe bi rêve bibe û tev li sîstema siyasî ya li Sûriyeyê bike. Îlham Ehmed, bal kişand ser modela Rêveberiya Xweseriya Demokratîk û ev tişt anî ziman: “Ev rêveberî temsîla îradeya siyasî ya pêkhateyên herêmê dike. Jin û pêkhateyên cuda di vê rêveberiyê de îradeya xwe ya siyasî ya hevbeş ava kirine. Lewra gelek hêz û aliyên siyasî eleqeyê didin vê sîstemê. Her kes dibîne ku divê Sûriye bi awayekî hevbeş were birêvebirin.”
‘Ez hêvîdarim wê kongre di demek nêz de pêk were’
Îlham Ehmed bal kişand ser hewldanên bi armanca yekkirina nêrîna hêz û partiyên siyasî yên li rojavayê Kurdistanê û da zanîn ku axaftinên li ser dîroka lidarxistina konferansa neteweyî tenê texmîn bûn, lê dema wê hîna nehatiye diyarkirin. Îlham Ehmed destnîşan kir ku derbarê çawaniya lidarxistina konferansê de nêrînên cuda derdikevin lê li ser piraniya xalan lihevkirinek çêbûye. Îlham Ehmed hêvî kir ku di demeke nêz de konferansa neteweyî ya partiyên siyasî yên rojavayê Kurdistanê pêk were û got: “Ev daxwaz a gel e. Em dixwazin hêz û partî helwesta xwe bikin yek, komîteyekê ava bikin ku bi desthilata Şamê re mûzakereyan bike da ku mafên Kurdan di destûra nû ya Sûriyeyê de werin mîsogerkirin.”
