Hevberdevkê Komîsyona Ziman Çand û Hunerê ya DEM Partiyê Heval Dilbihar diyar kir ku binçavkirina mamosteyên Kurdî tê wateya desteserkirina zimanê Kurdî û neteweya Kurd.
Duh serê sibehê mamosteyên Kurdî Ronayî Onen, Samî Tan û Mevlut Aykoç bi hinceta perwerdehiya zimanê Kurdî dane û pirtûka perwerdehiya Kurdî, “HÎNKER” çap kirin e, hatin binçavkirin. Serdozgeriya Komarê ya Stenbolê lêpirsînê bi rê ve dibe. Nerazîbûnên li dijî binçavkirina her sê mamosteyan berdewam dike.
Hevberdevkê Komîsyona Ziman, Çand û Hunerê ya DEM Partiyê Heval Dilbihar nerazîbûn nîşanî binçavkirina mamosteyên Kurdî Ronayî Onen, Samî Tan û Mevlut Aykoç da.
‘Banga dîrokî nasîna azadî û hemû zimanan e’
Heval Dilbahar bi bîr xist ku çend roj berê bi navê “Banga Aştî û Civaka Demokratîk” pêngaveke dîrokî ya serdemeke nû hat hat destpêkirin û got ku bi vê bangê mebest ew e aştiyeke birûmet û civakeke demokratîk were sazkirin. Heval Dilbahar diyar kir ku baş tê zanîn ku ew bang di nava xwe de nasîn û azadiya hebûn û nasnameya hemû netewe, gel, kom, civak û derdoran dihewîne û got: “Bêguman nasname, ji ziman, çand, bawerî, erdnîgarî û hemû nirxên netewe û koman pêk tê. Ev ji bo Kurdan jî wisa ye. Jixwe sedemeke bingehîn a têkoşîna gelê Kurd a van 50 salan her cureyê hovîtiyên li ser zimanê wan bû.”
‘Ziman ji bo Kurdan xeta sor e’
Heval Dilbahar anî ziman ku zimanê Kurdî hêmana herî bingehîn, xwebûnî û dîrokî ya neteweya Kurd e û wiha axivî: “Ziman xeta Kurdan a herî sor û jêneger e. Ji bo wan ji nan û avê wêdetir e. Ji ber vê yekê; ji bo ku hewldanên aştiyeke birûmet û avakirina civakeke demokratîk biçin serî divê beriya her tiştî hemû qedexekirin, zext, zordarî, sînor û dorpêçên li ser Kurdî hem di zagonan de hem jî li her qada jiyanê bên rakirin; divê Kurdî bibe xwedî statu û zimanê perwerdeyê. Divê Kurdî li her derê jiyanê serbest û azad be. Divê baş bê zanîn ku nêzîkatiya ji bo zimanê Kurdî di heman demê de nêzîkatiya ji bo aştî, azadî û demokrasiyê nîşan dide, nêzîkatiya ji bo bang û hewldanên rêzdar Ocalan ên aştî û civaka demokratîk dide.”
‘Berdewamiya polîtîkayên înkarê ye’
Heval Dilbihar destnîşan kir ku desteserkirina van mamosteyên Kurdî desteserkirina zimanê Kurdî ye û wiha axivî: “Ev jî tê wateya desteserkirina neteweya Kurd. Bêguman ev kiryara ku rasterast hewldaneke li dijî pêngava aştî û civaka demokratîk e nûjenkirina polîtîkayên klasîk ên 100 salan ên tunehesîbandinê ye. Qedexekirin, pişaftin, helandin û jiholêrakirina ziman, çand û nirxên bingehîn din ên neteweya Kurd in. Kiryarên wiha bi tu awayî nayên qebûlkirin; şermezarî û rûreşiyên mezin in; binpêkirina nirxên mirovahiyê ne. Divê mamosteyên zimanê Kurdî demildest bên berdan û rê li ber kiryarên wiha ku di heyama ku em tê de dijîn de di rastiya xwe de êrişên li dijî hewldanên çareseriyeke demokratîk in bê girtin. Divê her Kurdek, her azadîxwaz, demokrat û mirovahîparêzek li dijî kiryarên wiha têkoşîna xwe ya aştiyeke birûmet û civakeke azad û demokratîk bilindtir û berfirehtir bike.”
