Amed – Stranbêj Alî Tekbaş ê ku li Amedê beşdarî şahî û konsera ziman bû diyar kir ku zimanê Kurdî di malan de bê axaftin nayê jibîrkirin û got ku tu feydeya qedexe û astengiyên li pêşiya Kurdî nîn e û axaftina bi Kurdî azadbûna zimanê Kurdî ye.
Bi pêşengtiya Komeleya Lêkolînên Ziman û Çandên Mezopotamyayê (MED-DER), Sanatça Organîzasyon û Şaredariya Bajarê Mezin a Amedê û Şaredariya Peyasê bi boneya 21ê Sibatê Roja Zimanê Dayikê yê Cîhanê li ÇandAmedê bi beşdariya stranbêj û şanogeran 22yê Sibatê şahiyek qelebalix hat lidarxistin.
Stranbêj Alî Tekbaş ê ku bi lawje û selîqeyên herêma Colemêrgê tê nasîn duh beşdarî şahiya ziman bû. Alî Tekbaş demek çêbû ku li Londonê dijî û ji bo şahî û konseran ev çend roj çêbûne ku hatiye bakurê Kurdistanê û Tirkiyeyê.
Şahî bi konsera stranbêj Alî Tekbaş û Ayfer Duzdaş hat lidarxistin. Alî Tekbaş ê ku stanên herêma Colemêrgê got û welatiyan li stranên xwe kêfxweş kir, ji Ajansa Welat re axivî.
‘Serkeftin ji Ajansa Welat re’
Alî Tekbaş pîrozbahiyê li ajansa me kir. û got: “Ez serkeftinê ji bo hemû ajansên me Kurdî dixwazim. Ji bo Ajansa Welat jî serkeftinê dixwazim. Hêvîdar im em di demên pêş de kar û xebatên xwe li gel Ajansa Welat biaxivin. Ez gelek kêfxweş bûm.”
‘Zimanê me qedîm e, têr û tijî ye’
Alî Tekbaş destnîşan kir ku ji bo wî zimanek wekî Kurdî zimanek qedîm li ser cîhanê tûne ye û wiha got: “Bi hemû aliyan ve têr û tijî ye. Zimanê Kurdî di malan de bê axaftin nayê jibîrkirin. Bi zimanê Kurdî her kar tê çêkirin, ez niha li vir zimanê xwe strana dibêjim. Bi vî zimanî heta niha gelek tişt hatine çêkirin û tên çêkirin jî. Ez bi vê bawerim. Em li her qadê hene, ev rastiyek me ye. Em bi her tiştên xwe hene. Em jî parçeyêk vê cîhanê ne û em bi hebûna xwe serbilind in.”
‘Malbat bi çi zimanî biaxive zarok wî zimanî hîn dibe’
Alî Tekbaş diyar kir ku niha ew li Londonê dijî û zarokek wî heye û biriye kreşê lê berpirsên kreşê jê re gotine ku malbat li malê bi kîjan zimanê bi zarokên xwe re biaxive ew bi wî zimanê dielime û hîn dibe. Alî Tekbaş anî ziman ku kreşê jê re gotiye ew li kreşê tenê bi Îngîlîzî bi zarokan re biaxivin ji bo wan bes e, lê meseleya esil malê ye.
‘Ziman azadî ye’
Alî Tekbaş destnîşan kir ku ew dixwaze li Kurdistanê bi her awayî zimanê Kurdî li pêş bikeve û her kes bi zarokên xwe re bi zimanê Kurdî, zimanê dayîka xwe biaxive. Alî Tekbaş Alî Tekbaş anî ziman ku her kes bi zimanê xwe biaxive wê qedexe û astengiyên li pêşiya Kurdî nemînin û wê kes nikaribe qedexe bike û got: “Bila hemû ziman azad bin. Kesek vî zimanî neda me ye. Ev zimanê me yê xwezayî ye. Ji bo çi astengî û qedexe hebin. Axaftin azad bûn e. Heke em bi zimanê Kurdî biaxivin wê azad bibe. Zimanê Kurdî şîrin û xweş e.”
‘Amed mala min e’
Alî Tekbaş ji ber ku ew carek din li Amedê derketiye ser dikê û stran gotine gelek kêfxweş e û got: “Amed mala min e, salên dirêj min li Amedê jiyan kir. Ji bo ku ez hatim vir, wekî ez ji nû ve hatibim cîhanê.”
