TJAyê li Şirnex, Stenbol û Wanê bertek nîşanî cezayê li berdevka berê ya TJAyê Ayşe Gokkan hatiye birîn da û da zanîn ku ew vê biryarê qebûl nakin.
Bertekên li hemberî 19 sal û 6 meh cezayê ku li Berdevka Berê ya TJAyê Ayşe Gokkan hatiye birî her ku diçe zêde dibin.
Şirnex
Li Kolana Hunerê ya navçeya Cizîrê ya Şirnexê ji bo nerazîbûna cezakirina Berdevka TJAyê ya Berê Ayşe Gokhan daxuyanî hat xwendin. Li gel Parlementera DEM Partiyê ya Şirnex Newroz Ûysal Aslan, endamên Tevgera Jinên Azad (TJA) gelek kes tev li daxuyaniyê bûn û daxuyanî ji aliyê aktîvîsta TJAyê Adalet Fîdan ve hat xwendin.
Piştre Parlementer Newroz Ûysal Aslan got ku Ayşe Gokhan heya îro li her qadê li ber xwe daye û wiha axivî: “Îro cezayê hatiye dayîn di kesayeta Ayşe Gokgan de li jinên tekoşer hatiye birîn. Em ji silavên xwe ji Ayşe Gokhan û hemû girtiyan re dişînin. Berxwedana wan berxwedana me ye. Bi sekna wan em serbilind in, jin jiyan azadî.”
Daxuyanî bi berzkirina dirûşma, ‘Jin jiyan azadî’ bi dawî bû.
Stenbol
Tevgera Jinên Azad (TJA) li Qada Şîşhaneya Stenbolê daxuyanî da. Aktivîstên TJAyê, parlamenterên DEM Partiyê, Înîsiyatîfa Dayikên Aştiyê, rêveberên DEM Partî û HDKê û gelek kes tev li daxuyaniyê bûn. Jin li Qada Şîşhaneyê kom bûn û wêneyên Ayşe Gokkan û pankarta “TJA nayê darizandin” hate vekirin û dirûşmeya “Jin Jiyan Azadî” hate berzkirin.
‘Ayşe Gokkan li ku be jî wê têkoşînê bidomîne’
Aktivîsta TJAyê Sebahat Tuncel diyar kir ku Ayşe Gokkan hevrêyên wê ya têkoşînê ye û got: “Partiyên me hatin girtin, hevalên me hatin girtin û kuştin. Lê me tu carî serî netewand, Ayşe Gokkan jî yek wan hevalên me ye. Ayşe Gokkan li ku bê jî têkoşîna xwe û gelê Kurd dê bidomîne. Bi cezayan nikarin Ayşe Gokkan bitirsînin. Aliyek din pêvajo heye lê aliyek din ceza tê birîn, em van cezayan qebûl nakin. Dev ji cezakirina jinan berdin, paşê baweriya gel ji pêvajoyê werê.”
Daxuyanî bi dirûşmeya “Jin Jiyan Azadî bi dawî bû.
Wan
Tevgera Jinên Azad (TJA) li Wanê, li dijî cezayê girtîgehê yê 19 sal û 6 meh ku ji aliyê Dadgeha Cezayê Giran a 9an a Amedê ve li Berdevka Berê ya TJAyê Ayşe Gokkan hatiye birîn, daxuyaniyek da. Di daxuyaniyê de pankarta “Ayşe Gokkan vîna me ye, nayê darizandin” hat vekirin û dirûşma “Jin jiyan azadî” hat berzkirin. Meclîsa Dayikên Aştiyê, saziyên jinan û saziyên sivîl ên demokratîk tevlî daxuyaniyê bun.
Metna daxuyaniyê aktivîsta TJAyê Eylem Oklû xwend.
‘Em vê biryarê qebûl nakin’
Eylem Oklû diyar kir ku ev biryar ne tenê li dijî kesekê, lê belê êrîşeke li dijî vîna jinan û berxwedana wan a rêxistinî ye. Eylem Oklû da zanîn ku ew vê biryarê wekî destwerdaneke li dijî têkoşîna azadiya jinê dibînin û qebûl nakin û got: “Sûcên ku ji bo darizandina Gokkanê dikin hincet, li dijî parastina mafên jinan, pêşengtiya çalakiyên aştiyane û bilindkirina dengê li dijî pergala mêrperest e. Ayşe Gokkan zêdetirî 6 salan e girtî ye û destûr nedanê ku tev li cenazeyê dayika xwe bibe.”
‘Têkoşîna azadiyê ya jinê nayê mehkûmkirin’
Eylem Oklû destnîşan kir ku di şexsê Ayşe Gokkan de vîna jinê û felsefeya wê ya gerdûnî ya “Jin, Jiyan, Azadî” tê darizandin û wiha pê de çû: “Avakirina civakeke demokratîk tenê bi azadiya tam a jinê pêkan e. Loma îro eksena sereke ya hemû nîqaşên pêvajoyên demokratîk, têkoşîna jinê ye. Mekanîzmayên dadgeriyê yên ku jinê li malê digirin û pergala mêrperest diparêzin, li pêşberî têkoşîna me bêwate ne. Ne girtîgeh, ne biryarên dileyîstî yên dadgehan nikarin meşa azadiyê ya jinan rawestînin.”
Daxuyanî bi berzkirina dirûşman bi dawî bû.
