KURDÎGEHê li Parka Hunerê ya Rêya Armûşê ya Wanê konên “Zimanê Kurdî” veda. Konên ku pirtûkên Kurdî lê hatin danîn dê 6 rojan berdewam bike.
Komelaya Pêşvebirina Çand û Zimanê Kurdî (KURDÎGEH) bi boneya 15ê Gulanê Cejna Zimanê Kurdî li Parka Hunerê ya li navçeya Rêya Armûşê ya Wanê konên “Zimanê Kurdî” ku dê 6 rojan berdewam bike, veda. Di konan de standa pirtûkên Kurdî jî hat danîn. Qada ku kon lê hatin vedan bi pankartên “Em ê her derê bikin KURDÎGEH, her der Kurdî her dem Kurdî”, “Azadiya Kurdî azadiya civakê ye” û “Statûya Kurdî, perwerdehiya Kurdî” hat xemilandin. Welatî, taybetî eleqeyeke mezin nîşanî standa pirtûkan didin.
‘Berî her tiştî divê zimanê Kurdî bê qebûlkirin’
Vekirina standê bi gerandina govendan dest pê kir û gelek welatî beşdarî çalakiyê bûn. Dûre li ser navê KURDÎGEHê Hevberdevkê Komîsyona Çand û Ziman a DEM Partiyê Heval Dilbahar axaftineke kurt kir. Heval Dilbahar di axaftina xwe de bal kişand ser girîngiya ziman û got: “Zimanê Kurdî zimanekî bingehîn e. Kurd bi hezar salan e bi zimanê xwe dipeyivin. Zimanê me nasnameya me, hebûna me û axa me ye. Heke em zimanê xwe winda bikin, em ê her tiştê xwe winda bikin. Zêdetirî sed salan e hêzên desthilatdar hewl didin Kurdî qedexe bikin û ji holê rakin. Lê bi saya berxwedana Kurdan, Kurdî hîn li ser piyan e. Rêber Abdullah Ocalan dibêje ku ziman ji nan û avê girîngtir e. Ji ber wê yekê, di pêvajoya Aştî û Civaka Demokratîk de beriya her tiştî divê zimanê Kurdî were qebûlkirin. Divê Kurdî bibe zimanê fermî û di hemû saziyên giştî de were bikaranîn. Divê em jî ji bo vê yekê têkoşîna xwe mezin bikin.”
Konên ku dê heta 14’ê Gulanê vekirî be, dê her roj heta saet 18.00an ji gel re vekirî be.
