Di Lîga 1emîn a Trendyolê de Amedspor îro Bodrumsporê pêşwazî dike. Çavek camîayê dê li lîstikê be û çavek jî li lîstika rikeberê sereke Eroksporê be.
Di Lîga 1emîn a Trendyolê de lîstikên hefteya 37an dest pê kir. Di hefteya 37an de jî hem rikeberiya rêze duyemîn û hem jî rikeberiya xeta play-offê berdewam dike. Vê hefteyê jî lîstikên herî zêde teşe bidin lîgê cardin ên Amedspor û Eroksporê ne. Îro Amedspor li mala xwe Bodrumsporê pêşwazî dike û Esenler Erokspor jî diçe deplasmana Sariyersporê.
Çavek Amedê dê li Eroksporê be
Amedsporê bi encamên du hefteyên borî girtîn, avantajek mezin ji dest da û bi 72 pûanan di rêza sêyemîn de cih digire. Ji bo di rêza duyemîn de rasterast derkeve Sûper Lîgê divê hem du lîstikên mayîn qezenc bike û piştre jî li bendê bimîne ku Esenler Erokspor berabere bimîne an jî winda bike. Lê Esenler Erokspor ku bi 73 pûanan di rêza duyemîn de cih digire wekî favoriyê lîstika bi Sariyer Sporê re tê dîtin.
Stad dê tejî bibe
Lîga 1emîn ber bi dawî ve diçe. Amedspor dê îro li mala xwe Bodrumsporê pêşawzî bike û hefteya bê jî biçe deplasmana Îdir FKyê. Lîstika îro lîstika dawî ya Amedspor li mala xwe bilîze. Bi vê boneyê alîgirên Amedsporê seferber bûne. Ligel ku di du hefteyên borî de encamên neyînî girtin jî bilêdên lîstika îro di nav du rojan de qetiyan. Li gorî daneyên komeleyên alîgiran zêdeyî 30 hezar bilêd hatin firotin.
Amedspor bi pûanekê fînala play-offê garantî dike
Ligel ku şansê derketina raste rast ê Amedsporê qels bibe jî di du lîstikan dawî de tenê pûanekê bigire dê fînalîstiya play-offê misoger bike. Ji bo wê Amedspor di aliyê play-offê de ji aliyekê ve rihet e. Bes ji bo derketina rasterast jî divê van lîstikan qezenc bike.
Lîstik îro seat di 16:00an de li Stada Tahir Elçî ya Amedê tê lîstin û li ser Bein Sportsê bi zindî tê dayîn.
