Amedspor di rêya şampiyoniyê de bi piştgiriyeke mezin a gel heye. Alîgirên ku ji gelek bajarên Kurdistanê û Tirkiyeyê ji bo maçê herikîn Amedê, diyar kirin ku serkeftina Amedsporê ne tenê serkeftina tîmekê ye, di heman demê de serkeftina vîna gel e.
Stadyuma Amedê bû şahidê coş û kelecana deh hezaran. Alîgirên ku ji bo maça girîng a Amedsporê hatibûn cem hev, daxwaza xwe ya ji bo derketina Super Lîgê bi yek dengî qêriyan. Di nav girseya ku nêzî 35 hezar kesî bû de, ji Midyadê heta Antalyayê, ji Êlihê heta gelek bajarên din welatî hebûn.
‘Ev tîm dilê me ye’
Hamza Komlekçî bal kişand ser qerebalixiya bajêr û got: “Roja maça Amedsporê, ji gelek bajaran mirov tên vir. Divê Amedspor vê maçê qezenc bike û bibe şampiyon. 35 hezar kes ji bo serkeftinê hatine maçê; divê Amedspor ji bo piştgirên xwe derkeve Super Lîgê.”
‘Emê navê wê bilind bikin’
Seyît Yakut jî da zanîn ku ew tu carî tîma xwe bi tenê nahêlin û ev tişt gotin: “Em hemû gel piştgirên Amedsporê ne. Em tîma xwe digirin û bernadin. Serkeftina wê serkeftina me ye. Înşallah em ê navê wê bilind bikin.”
Ji Antalyayê heya Batmanê piştgirî
Yek ji piştgirên ku ji dûr ve hatiye, Derman Kahraman e. Kahraman hestên xwe wiha anî ziman: “Ez ji bo serkeftina Amedsporê ji Antalyayê hatime. Em piştgirên vê tîmê ne û em serkeftina tîma hemû Kurd û Kurdistanê dixwazin.”
‘Morala gelê me bilind kide’
Ji bajarê Êlihê jî gelek kes ji bo Amedsporê li qadan bûn. Adnan Tekeş diyar kir ku serkeftina tîmên herêmê morale miletê bilind dike û got: “Batmanspor derket lîga 1’emîn, înşallah Amedspor jî derkeve Superlîgê. Ev serkeftin ji bo welatê me û gelê me yeke girîng e.” Ahmet Gûltekîn jî heman daxwaz dubare kir û destnîşan kir ku ew ji Êlihê tenê ji bo serkeftina Amedsporê hatine.
‘Em dixwazin bibêjin em jî hene’
Di nav piştgiran de jin û ciwan jî bi roleke çalak cihê xwe girtin. Piştgirên ku bi navê Nur Mîna Porsuk bal kişand ser serkeftina Amedsporê û wiha domand: “Em ji bo serkeftina tîma xwe çi ji destê me tê dikin. Armanca me îsal Superlîg e.”
‘Ji bo em jî xuya bikin’
Arzu Aflatun jî ji bo serkeftina Amedsporê daxwaziya xwe wiha anî ziman: “Amedspor can û dilê me ye. Em dixwazin tîma me bi hêz bibe û derkeve astên herî bilind.” Evîn Akgûl bal kişand ser îradeya hebûnê û wiha got: “Em dixwazin Amedspor serbikeve da ku em jî xuya bikin û bibêjin em jî hene.”
Serkeftina Amedsporê ‘serhildana gel e’
Adem Aslan ku ji Midyadê hatiye, wiha bal kişand ser nasnameya tîmê: “Serkeftina Amedsporê, serkeftina hemû gelê me ye. Ew tîma hemû Kurdan e.” Sûreyya Ezel bal kişand ser girîngiya civakî ya vê serkeftinê û got: “Nêzîkî 35 hezar kes li vir in. Çavên hemû gel li ser Amedê ye. Em hêvî dikin ku ev serkeftin bibe mîna serhildanekî (moralekî) ji bo hemû gelê me.”
Ersîn Rençber jî baweriya xwe ya tîmê wiha anî ziman: “Em ji tîma xwe bawer in. Em dixwazin Amedspor di Superlîgê de li dijî tîmên Tirkiyeyê bilîze. Em her tim li pişt tîma xwe ne.”
