15 ciwanên enternasyonalîst ku ji bo piştgiriya Rojava hatibûn bakurê Kurdistanê, li Mêrdînê hatibûn binçavkirin. 15 ciwanên ku derbarê wan de biryara dersînorkirinê hatibû wergirtin û polîsan ew biribûn Stenbolê ji ber sedemeke nediyar bi tundiyê ji balafirê hatin peyakirin.
Rojavayê Kurdistanê bi rojane di bin êrîş û hewldanên dagirkeriyê ya çeteyên HTŞê û piştevana wan dewleta Tirk de ye. 15 ciwanên enternasyonalîst û Fereshte Khosravî ku ji rojhilatê Kurdistanê ye di 24 Çileyê de ji bo piştgiriya berxwedana Rojava ji Almanyayê hatin Amedê. Ciwan di 27ê Çileyê de derbasî navçeya Nisêbînê ya Mêrdînê bûn. 15 ciwanên ku ji saziyên weke Koma Xebatên Enternasyonalîzmê ya Hannoverê, Ciwanên Çep – Solid, Ciwanên Demokratîk ên Yuna, Keçên Demokratîk ên Rozalia, Federasyona Rêxistinên Têkoşerên Çîna Civakî, Sazîbûna Komûnîst pêk dihatin di çarçoveya xebatên xwe de li Nisêbînê bûn. Fereshte Khosravî jî tev li çalakiya ciwanan a ji bo piştgiriya Rojava bû.
Li Qoserê hatin binçavkirin
15 ciwanên enternasyonalîst û Fereshte Khosravî dema di 28ê Çileyê de ji Nisêbînê diçûn navçeya Qoserê nêzî Qoserê ji aliyê polîsan ve hatin rawestandin. Polîsên Şaxa Koçê û hêzên çevîkê bi hinceta biryara dadgehê heye û pasaportên wan hatine sînorkirin ciwan binçavkirin. Polîsan ji parêzeran re ragihand ku ciwan birine Îdareya Koçê ya Bajêr a Mêrdînê, derbarê wan de biryara binçavkirinê nîne tenê derbarê wan de biryara çavdêriya îdarî heye. Parêzerên Şaxa OHDa Mêrdînê xwest bi ciwanan re hevdîtinê bikin lê ev daxwaza wan nehate qebûlkirin û nehiştin parêzer bikevin Îdareya Koçê ya Bajêr.
Destûr nedan parêzeran ku bi ciwanan re hevdîtinê bikin
Li gorî agahiyên ku parêzeran dan derbarê ciwanên enternasyonalîst û Fereshte Khosravî de biryara dersînorkirinê hatiye dayîn. Ciwan duh dora saet di 17.00an de ji Mêrdînê li gel polîsan ber bi Stenbolê ve hatin birêkirin. Hate ragihandin ku ciwan birine Navenda Paşveşandinê ya Stenbolê û destûr nedane ku parêzer bi wan re hevdîtinê bikin.
Têkilî bi ciwanan re qut bûye
Li gorî agahiyên ku me bidestxistin ciwan îro dora saet di 18.00an de gihiştin Stenbolê. Ciwan li Termînala Kargoyê ya Balafirgeha Stenbolê sê saetan hatin sekinandin. Ciwan piştî ji bo bên dersînorkirin li balafirê hatin siwarkirin piştî demekê ji ber sedemeke nayê zanîn bi tundiyê ji balafirê hatin peyakirin. Ciwanan dîmenên muxaliyea wan kişandin û dora saet di 21.30an de dîmen şandin. Niha têkilî bi ciwanan re qut bûye û telefonên wan girtî xuya dikin. Li ser vê yekê parêzer çûn balafirgehê.
