Seroka Daîreya Çand, Huner û Karên Civakî ya Şaredariya Bajarê Mezin a Amedê Zeynep Yaş ji bo Festîvala Şanoyê ya Navneteweyî ya Amedê wiha bang kir: “Kerem bikin di van 10 rojan de şanoya cîhanê û hemû rengên jiyanê hîs bikin.Werin em motoya ‘Ji bo Aştiyê Diyalogê’ di nava civakê de xurt bikin.”
Şanoya Bajêr a Şaredariya Bajarê Mezin a Amedê (DBŞT) ya ku di bin banê Serokatiya Daîreya Çand, Huner û Karên Civakî de xebatên xwe dimeşîne, îsal 11emîn Festîvala Şanoyê ya Navneteweyî ya Amedê bi temaya “Ji bo Aştiyê Diyalog” pêk tîne. Festîvala ku dê di 22yê Nîsanê de dest pê bike û heta 2yê Gulanê dewam bike, dê komên şanoyê yên 19 welatan li Amedê bîne cem hev. Di festîvalê de bi giştî 22 lîstik dê bên nîşandan. Beşeke zêde ya lîstikan dê li Navenda Çand û Kongreyê ya Çand Amedê bên lîstin û hin performans jî dê li qadên vekirî derkevin pêşberî temaşevanan. Di çarçoveya festîvalê de ligel lîstikan; hevpeyvîn, panel, atolye û hevdîtinên hunermendan jî dê bên organîzekirin.
Komên şanoyê yên ku dê ji gelek welatên weke Îtalya, Swîsre, Îran, Sûriye, Tûnis, Erebistana Siûdî, Ûkrayna û Ûgandayê werin dê heman sehneyê parve bikin û tevkariyê li danûstandina çandî bikin. Festîval armanc dike ku bi rêya hilberîna hunerî, di navbera erdnîgariyên cihêreng de diyalogê ava bike.
Seroka Daîreya Çand, Huner û Karên Civakî ya Şaredariya Bajarê Mezin a Amedê Zeynep Yaş, têkildarî festîvalê ji Ajansa Welat (AW) re axivî.
‘Li hemberî şer, diyalogeke mirovî’
Zeynep Yaş, di axaftina xwe de diyar kir ku di vê serdemê de hewcedariya herî mezin a Rojhilata Navîn aştî ye û wiha got: “Îsal Şanoya Bajarê Amedê temaya xwe weke ‘li hemberî şer diyalogeke mirovî ku dikare ji bo jiyanê gelek çareseriyên baş pêk bîne’ destnîşan kiriye. Huner dikare vê qêrîn û êşê bi rengekî afirîner bigihîne dilê gel. Ji ber vê çendê jî, me têgeha ‘Ji bo Aştiyê Diyalog’ weke motoya vê festîvalê derxist pêş. Ev peyam ji bo me gelekî girîng e; ji ber ku em di wê baweriyê de ne ku aştî pêwîstiya me hemûyan e, nemaze em hewceyî aştiyekê li Rojhilata Navîn in. Di nava vê gur û geşa şer de, ne tenê weke çirûskekê, lê weke çirayeke geş em dixwazin bi vê peyamê û bi riya hunerê festîvala xwe bimeşînin.
‘Şano nîşaneya civakeke pêşketî ye’
Zeynep Yaş, di berdewamiya axaftina xwe de bal kişand ser taybetmendiya şanoyê ya civakî û destnîşan kir ku şano ne tenê huner e, di heman demê de zimanê gel e. Zeynep Yaş wiha pê de çû: “Şano pirek e di navbera jiyana rasteqîn û ew jiyana ku mirov dixwaze bi hunerê xwe tê de bibîne ye. Ev helwesta şanoyê hewldaneke rewşenbîrî û nîşaneya civakeke pêşketî ye. Em dixwazin vê peyama aştiyê ne weke çirûskekê, weke çirayeke geş bimeşînin.”
‘Werin em bi hev re hemû rengên jiyanê hîs bikin’
Zeynep Yaş bi taybetî li ciwanan banga tevlibûnê li hemû gel kir û axaftina xwe wiha bi dawî kir: “Em nifşên nû û ciwanan vedixwînin vê festîvalê da ku ew bi zimanê aştiyê pêşerojeke baştir ji xwe re ava bikin. Kerem bikin di van 10 rojan de şanoya cîhanê û hemû rengên jiyanê hîs bikin. Werin em motoya ‘Ji bo Aştiyê Diyalogê’ di nava civakê de xurt bikin.”
