Jina bi navê Zelîxa Qido ku 7 sal berê di encama êrişên Tirkiye û çeteyên wê de neçarî koçberiyê bû bi hêviya vegera axa û mala xwe ya li Serêkaniya di bin dagirkeriya Tirkiyeyê de dijî.
Ligel Peymana 29ê Çiya ya di navbera Hêzên Sûriya Demokratîk (HSD) û Hikumeta Demkî ya Sûriyê de pêk hatî jî dewleta Tirk hêj dagirkeriya xwe ya li Serêkaniyê bi dawî nekiriye. Di demek çav li rê ye ku dewleta Tirk dawî li dagirkeriya xwe bîne, koçberên Serêkaniyê jî li benda vegerê ne. Jina bi navê Zelîxa Qido jî kesek li benda vegera ser ax û mala xwe ya li Serêkaniyê ye.
‘Hêza me yekîtiya me ye’
Zelîxa Qido ku ji ANHAyê re axivî bal kişand ser têkoşîna gelê Kurd û bi gotina, “Hêza me di hevgirtina me de ye” riya serkeftinê destnîşan kir. Zelîxa Qido ji bo ku di bin serweriya çeteyên dewleta Tirk de nejî, dev ji mal û milkê xwe berdide. Rêwîtiyeke 7 salan a koçberiyê derbas dike, lê hêviyên wê yên rojekê vegere bajarê xwe tu carî kêm nebûne.
‘Koçberî bandorek neyînî li zarokan dike’
Zelîxe Qido niha li dibistaneke bajarê Girke Legê dimîne û wiha behsa serpêhatiya xwe dike: “Êrişî bajarê me kirin, baxçe û hemû mal û milkên me wêran kirin. Em neçar man koç bikin. Bi salan li qampê û di bin konan de em man. Şert û mercên qampê û niha jî li dibistanan mayîn, di aliyê psîkolojîk de bandoreke neyînî li zarokan dike.”
‘Hêzên navneteweyî bêdeng in’
Li ser zordariyên hêzên dagirker jî Zelîxa Qido got ku êrişên mezin li ser wan hatine kirin û ev tişt gotin: “Êrişî herêmê kirin û bi hezaran malbat neçarî koçberiyê kirin. Bi taybet niha jiyana bi hezaran zarokan di xetereyê de ye û hêzên navneteweyî li hemberî vê yekê bê deng in.” Zelîxe Qido bal kişand ser daxwaza wan a yekitiya gelê Kurd û got: “Em bang li gelê Kurd ê tevahî Kurdistanê dikin ku yekitiya xwe çêkin. Hêza civakê di hevgirtina wê de ye.”
