Wan – Rêveberên DBPê û DEM Partiyê yên li Wanê têkildarî êrişên qirkirinê li ser Rojavayê Kurdistanê axivîn û diyar kirin ku yekîtiya gelê Kurd dê van êrişan têk bibe.
Çeteyên HTŞê, DAIŞê û SMOyê bi piştgiriya Tirkiyeyê ji 6ê Çileyê heta niha êrişî gelê Rojava dikin. Li dijî van êrişan Kurd li serenserê Kurdistan, Tirkiye, Ewropa û gelek welatên cîhanê dadikevin kolanan û van êrişan şermezar dikin û piştgiriya xwe ji bo Rojava nîşan didin.
Rêvebêrê Partiya Herêmên Demokratîk (DBP) a Wanê Saît Karabiyik û Hevserokê Partiya Wekhevî û Demokrasiyê ya Gelan ya Navçeya Artemêtanê (DEM Partî) derbarê êrişên komên çeteyan û yekitiya gelê Kurd de axivîn.
‘Êriş bi planên hêzên hegemonîk pêk tên’
Saît Karabiyik bal kişand li ser civîna 6ê Çileyê ya di navbera HTŞê û û Îsraîlê de pêk hatibû û da zanîn ku êrişên li dijî gelê Kurd piştî vê civînê dest pê kirin. Saît Karabiyik diyar kir ku piştî lihevhatina Şam û Îsraîlê berjewendiyên hêzên hegemonîk pêk hatin û wiha got: “Piştî ku berjewendiyên hêzên hegemonîk hatine cih, van hêzan Kurd tenê hiştin. Hêzên çete hemû hiqûqa navneteweyî binpê kirin û êrişî Kurdan kirin. Ev êriş rasterast di encama planên hêzên hegemonîk de pêk hatin.”
‘Pirsgirêkên navxweyî daynin aliyekê’
Saît Karabiyik li ser giringiya yekitiya neteweyî ya Kurd jî sekinî û bal kişand xeteriya li ser gelê Kurd û wiha pê de çû: “Çi dibe bila bibe, ji bo me ya herî girîng yekitiya gelê Kurd e. Heke Kurd hemû bibin yek, tu hêz nikarin Kurdan têk bibin. Di vir de berpirsyariya herî zêde jî dikeve ser Başûr. Divê Hikumeta Başûr rola xwe pêk bîne. Di nav me de çi pirsgirêkên me hebin jî divê em wan bidin aliyekî, em hemû bibin yek û li dijî wan DAÎŞiyan bisekinin. Ew hêza Kurdan jî heye. Divê partiyên siyasî yên Başûr jî piştgiriyê bidin gelê Kurd yê ku ji bo Rojava li ser pêyan e. Deriyê Sêmalka vekin.”
‘Ev Lozana duyemîn e’
Hevserokê DEM Partiyê yê Navçeya Artemêtanê Recep Gultepe derbarê êrişên çeteyên HTŞê yên li ser Rojava diyar kir ku armanca van êrişan pêkanîna Lozana 2yemîn e û got: “Daxwaza wan ew e ku careke din li ser maseyê bi tifaqeke cîhadîst ya li gel Ereban, Kurdan lewaz bikin. Lê îradeyeke xurt a yekîtiya Kurdan ew şaş kirin. Ên ku Lozana duyemîn armanc dikirin li benda vê serhildana Kurdan nebûn. Bi serhildanên li çar parçeyên Kurdistanê yekîtiya Kurdan derkete holê, divê em berê xwe bidine yekîtiya Kurdan.”
‘Rojava modeleke cuda ye’
Recep Gultepe bi bîr xist ku Rojava ji bo hemû cîhanê modeleke cuda ye û wiha pê de çû: “Bi modela Rojava jîyaneke civakî ya pir rengî, pir dengî û exlaqî hate avakirin û rêvebirin. Bi vê modelê xwastin ku ev şerê sedan salan e li Rojhilata Navîn di navbera gel û baweriyên cuda de tê meşandin, pêşî lê bê girtin. Lê daxwazên hêzên hegemon di nava vê modelê de cih ne digirt. Ji ber vê yekê şerê ku îro tê meşandin ji ber daxwazên dewletên hegemon e.”
‘Divê Kurd dev ji nakokiyên navxweyî berdin’
Recep Gultepe Di dawiya axaftina xwe de bi lêv kir ku divê gelê Kurd ji vê saetê şûn ve nakokiyên navxweyî yên siyasî, birdozî ji nav xwe rake û axaftina xwe wiha bi dawî kir: “Rewşa niha ji bo yekîtiya gelê Kurd derfeteke mezin e. Ji Başûr heta Bakur ji Rojava heta Rojhilat divê em yekîtiya gelê Kurd bi awayekî mirovî, wîjdanî û exlaqî ava bikin.”
