Wan – Sibê Cejna Remezanê ya civaka bisilman e. Di roja Remezanê ya dawiyê de welatiyên Wanê berê xwe dan sûk û bazaran. Welatiyan destnîşan kirin ku ji ber krîza aboriyê nikarin weke berê pêdiviyên xwe yên cejnê dabîn bikin û gotin: “Her tişt pir biha ye em ji sedî 20 pêdiviyên xwe incax distînin.”
Li Wanê ji bo Cejna Remezanê liv û tevgereke zêde li sûk û bazaran heye. Li tevahî kolanên Wanê tezgeh hatine vekirin. Ji şekirên cejnê, loqim û gulavê bigire hata cil û bergan û goreyan gelek pêwistiyên bingehîn li ser tezgahan tên firotin. Lê belê li ruxmê tevgera zêde li bazaran heye jî, ne welatî ne jî firoşkar ji rewşa heyî ya aborî razî ne. Welatiyên ku ji bo stendina pêdiviyên cejnê derketin sûk û bazaran, bal kişandin ser zêdebûna bihayê tiştan û diyar kirin ku ji ber giraniya fiyeta tiştan nikarin hemû pêdiviyên xwe pêk bînin.
Esnafan ku axivîne bal kişand ser krîza aborî û gotin: “Em serê swibê heta êvarê li vir, ji hal dikevin ku cil û bergan di destê xwe de bifiroşin da em jî pêdiviyên xwe û malbata xwe dabîn bikin. Lê ji ber ku bi em jî bi bihayê zêde dikirin, neçar in ku 50-60 lîreyî jî kar daynin ser bihayê tiştan. Biha zêde dibe welatî jî nikarin bikirin. Heta tiştekî distînin bi saetan bazarê dikin û hewl didin ku em 10-20 lîreyan kêm bikin.”
Welatiyan ji bo dabînkirina pêdiviyên xwe daketina kolanan jî dan zanîn ku bihayê her tiştî gelek zêde bûya û wiha gotin: “Her tişt gelek biha ye. Her roj zem tê ser tiştan. Mazot zêde dibe, dolar zêde dibe pêdiviyên jiyanî jî zêde dibin. Em incax ji sedî 20 pêdiviyên xwe dikarin bistînin.”
