Turan Uysal ê li Girtîgeha Boluyê girtî bû û berdana wî salekê ji aliyê Lijneya Îdare û Çavdêriyê ve hatibû astengkirin, piştî 31 salan hat berdan. Turan Uysal ku li bajarê xwe Mûşê bi awayekî girseyî hat pêşwazîkirin, banga avakirina aştiyeke birûmet kir.
Turan Uysal ku li navçeya Gimgimê ya Mûşê ji dayik bûye, di sala 1995an de hatibû binçavkirin û girtin. Turan Uysal di Dadgeha Ewlehiyê ya Dewletê (DGM) ya Xarpêtê de hat darizandin û piştre di girtîgehên Dêrsim, Elbistan û Mûşê de ma. Turan Uysal ê ku herî dawî li Girtîgeha Tîpa F a Boluyê dihat girtin û înfaza wî salekê ji aliyê Lijneya Îdare û Çavdêriyê (İGK) ve hatibû astengkirin, piştî 31 salan hat berdan. Turan Uysal li Mûşê ji aliyê malbata xwe û Nûnertiya Komeleya Alîkarî û Piştevaniya bi Malbatên Girtî û Hikûmxaran re (TUHAY-DER) ve bi girseyî hat pêşwazîkirin.
Turan Uysal di pêşwaziyê de axivî û bal kişand ser berdêlên ku gelê Kurd dane û diyar kir ku divê jiyaneke birûmet bi hev re bê avakirin û wiha got: “Ez daxwaz dikim ku pevçûn bi dawî bibin û aştiyeke birûmet pêk bê. Gelek hevalên me yên girtî hêj di girtîgehan de ne û berdêlên gelekî giran dane. Hêviya me azadiya hemû hevalan e.”
