Hevserokê Giştî yê DEM Partiyê Tuncer Bakirhan ku di panela ciwanan a li Amedê de axivî û qala rol û misyona ciwanan kir û wiha got: “Heke ciwan xwedî li vê pêvajoyê derkevin, em dikarin civakek û welatekî demokratîk ava bikin.”
Piştevaniya Xwendekarên Azad ên Dîcleyê di çarçoveya “Banga Aştî û Civaka Demokratîk” a Rêberê Gelê Kurd Abdullah Ocalan de li avahiya Şanoya Bajêr a Amedê bi dirûşma “Tev li bibe, nîqaş bike, biguherîne” panelek li dar xist. Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, endam û rêveberên DEM Partiyê û gelek xwendekar tev li panelê bûn.
Tuncer Bakirhan diyar kir ku partiya wan partiyeke ciwanan e û got ku partiyên ciwan têde hebin tevî êrişan jî li ser pêya dimînin û xwe didomînin. Tuncer Bakirhan destnîşan kir ku hemû pergalên ku ciwan di nav de nebin bi têkçûnê re rûbirû dimînin û qala girîngiya rol û misyona ciwanan kir.
‘Hêdî hêdî pergalên yekperest bi dawî dibin’
Tuncer Bakirhan da zanîn ku li cîhanê gelek krîzên aborî hene û bi lêv kir ku hêzên hegemon ku dibin xwediyê rêyên bazirganiyê şer û pevçûnan derdixînin. Tuncer Bakirhan anî ziman ku tevî krîz û aloziyên heyî jî hêviya wan xurt e û wiha got: “Em jî hewl didin li cem kesên ku hêviyê didin bisekinin. Li kêleka me pergalên nû tên avakirin. Hêdî hêdî pergalên yekperest bi dawî dibin. Welatên ku bi awayekî wekhev nêzî civaka xwe bin, têk naçin. Banga birêz Abdullah Ocalan jî li ser vê yekê ye. Birêz Ocalan ev yek dît.”
‘Berpirsyartiya me gelekî mezin e’
Tuncer Bakirhan destnîşan kir ku banga 27ê Sibatê destpêka pêvajoyeke nû ye û wiha got: “Banga 27ê Sibatê dîroka gelê kurd û tirk a hezaran salan jî li ber çavan digire. Birêz Ocalan îşaret dike ku weke Dîwarê Berlînê, dîwarê di nava gelan de hilweşiya. Li vir peywîr û berpirsyartiyeke mezin dikeve li ser milê me. Heke ciwan bi xwendinên xwe xwedî li vê pêvajoyê derkevin em dikarin civakek û welatekî demokratîk ava bikin ku gelê kurd û elewî tune neyên hesibandin. Berpirsyartiya me gelek mezin e. Li Tirkiyeyê ciwan weke xetere hatin dîtin. Bila ciwan polîtîk nebin gelek polîtîkayên qirêj li ser ciwanan hatin meşandin. Kemal Kûrkût, Şerzan Kûrt û gelek ciwanên din bûn qurbanê van polîtîkayan. Di vê pêvajoyê de divê ewilî ciwan berpirsyartiyê bigirin. Bêyî ku guh bidin gotinên derdorê divê ji bo siyaseta Tirkiyeyê biguherînin bikevin nava liv û tevgerê. Tirsa herî mezin a pergalan azadîbûn û demokratîk bûn e. 600-700 hezar xwendekar neçar man dest ji zanîngehên xwe berdin. Ji xwe tu wateya dîplomeyan jî nemaye. Ji bo avakirina bingeke demokratîk a li Tirkiyeyê divê em têbikoşin. Banga aştî û civaka demokratîk ne tene ji bo kurdan ji bo 85 milyon mirovan azadiyê dixwaze. Pêşiyê li ciwanan vedike. Em bawer dikin ku em ê serbikevin.”
