Rayedarên Îranê û Serokê Amerîkayê Donald Trump di nava vê rageşiyê de diyar dikin ku hevdîtinên wan hene û didomin. Her wiha tevî van daxuyanî û peyaman jî Îran û Amerîka gef û guran jî li hev dixwe.
Daxuyaniyê ji Îranê tên dayîn hevdu nagirin û tişta rayedarek dibêje rayedareke din bi daxuyaniyeke din pûç dike. Serokê Amerîkayê Donald Trump 2yê Sibatê li Qesra Sipî bal kişand ser van daxuyaniyên ne li hev û daxuyaniyek da rojnamegeran. Trump diyar kir ku “di van kêliyan de keştiyên wan ên şer ên mezin ber bi Îranê ve diçin û di vê rageşiyê de jî hevdîtinên wan û Îranê didome.” Her wiha Îran sînyalên ne li hev dide.
Trump her wiha gefeke sergirtî jî xwar û got: “Dê encam çewan be em ê bibînin.” Lê li gel vê yekê jî Trump bendewariya xwe ya çareseriyê jî venaşêre û got: “Heke em rêyeke çareseriyê bibînin pir baş e; heke rêyeke çareseriyê nebîne jî dê tiştên xirab çêbin.”
‘Îran dibe ku 400 kg uranyuma dewlemendkirî radest bike’
Rayedareke ku nave xwe nexwest eşkere bike ji Reutersê axivî. Rayedar di axaftina xwe de got ku ‘dîplomasî dewam dike’. Îran ji bo ji nûve hevdîtin dest pê bike derbarê radestkirina 400 kg uranyuma dewlemendkirî deriyan ji binîve digire. Ev rayedar hê pêşdetir diçe û dibêje: “Heke şert û êriş nebe Îran kare dewlemenkirina uranyumê ji binî ve rawestîne.” Rayedarê Îranî ji bo vê dixwaze ku Amerika hêzên xwe ji derdora Îranê vekişîne.
‘Îran, uranyuma dewlemedkirî radest nake’
Piştî vê agahiyê Cîgirê Alî Xamaney, Alî Şamxanî ji televizyona Al Mayadeen re axivî û di axaftina xwe de diyar kir ku Îran uranyuma dewlemendkirî radest nake û dernaye dervayê Îranê. Şamxanî eşkere dike ku Îran ji bo şerek amadene ku Amerîka êriş bike dê Îran jî êrişê Amerîka û Îsrailê bike.
Zavayê Trump, Kushner jî dê beşdarî hevdîtinên li Stenbolê bibe
Li gor nûçeya Axiosê ku xwe dispêre rayedarekî Amerîkî dê zava û Şêwirmendê Serokê Amerîkayê Jared Kushner jî beşdarî civîna roja Înê ya li Stenbolê bibe. Ev civîna li Stenbolê dê di navbera Nûnerê Amerîkayê Steve Witkoff û Wezîrê Derve yê Îranê Abbas Arakçî de li ser rêkeftineke nukleerî pêk bê.
Tê gotin ku di vê civîna her du aliyan de mijara moşekan neye nîqaşkirin. Her wiha Îsralî hewl dide ku ligel çeka nukleerî, uranyuma dewlemendkirî mijara moşekan jî bê nîqaşkirin û li ser îmhakirina wan peymanek bê mohrkirin.
