Nûnertiya TMMOBê ya Wanê, têkildarî hezaza ku li ser rêya Colemêrg û Wanê pêk hatibû raporeke ji 9 rûpelan weşand û diyar kir ku di rapora ÇEDê ya tesîsa berhevkirina bermayiyan de analîz bi rengekî rast nehatine kirin.
Nûnertiya Yekîtiya Odeyên Endezyar û Avahîsazên Tirk (TMMOB) ya Wanê, têkildarî hezaza ku di 11ê Nîsanê de li ser rêya bejahî ya Colemêrg-Wanê pêk hatibû raporeke berfireh weşand. Di raporê de hat destnîşankirin ku ev karesat ne tenê pirsgirêkeke herêmî ye, ew encama plansazî û polîtîkayên endezyariyê yên ne baş e. Her wiha hat diyarkirin ku sedemên bingehîn ên bûyerê, hilbijartina şaş a cih, lêkolînên jeolojîk-etut ên kêm û kêmasiyên di plansaziya veguhastinê de ne.
‘Analîzên rîskê dirust nehatine kirin’
Di rapora 9 rûpelî de hat gotin ku di pêvajoya ÇEDê ya tesîsa bermayiyên hişk a li herêma hezazê de, tespîta “Rîska hezazê tune ye” hatiye kirin. TMMOBê diyar kir ku ev tespît tenê xwe dispêre çavdêriyan û ji aliyê zanistî ve kêm maye. Tevî ku herêm di nav xeta erdhejê ya pileya yekem de ye, analîzên rîskê bi rengekî rast nehatine kirin.
Kêmasiya plansaziyê
TMMOBê bal kişand ser wê yekê ku xeta Colemêrg-Wanê tenê bi rêyekê ve tê girêdan û ev yek dibe sedema lawaziyeke mezin. Nebûna rêyên alternatîf wekî “kêmasiya plansaziyê” hat nirxandin. Hat diyarkirin ku ji ber girtina rê; di serî de tenduristî, lojîstîk û bazirganî, di gelek qadan de pirsgirêkên giran derketine. Her wiha hat gotin ku veguhastina navneteweyî ya li ser Deriyê Sînor ê Bajêrgehê rawestiyaye û herêm ji aliyê aborî û civakî ve bi neyînî bandor bûye.
‘Divê bi polîtîkayên mayînde were ava kirin’
Di raporê de hat destnîşankirin ku qutbûna têkiliya Colemêrgê ya bi Wanê re gihîştina xizmetên perwerde û tenduristiyê jî zehmet kiriye. Wekî çareserî ev pêşniyar hatin kirin: “Divê lêkolîneke teknîkî ya serbixwe were kirin. Ji bo qada rîskdar nirxandina cihekî nû were kirin. Tedbîrên acîl ên jeoteknîkî werin girtin. Ji bo Colemêrgê plansaziyeke sereke (master plan) ya veguhastinê ya demdirêj were amadekirin.”
Di dawiya raporê de hat gotin ku di plansaziyên giştî de divê mirov li ser rêgezên zanistî û endezyariyê bimeşe û hat destnîşankirin ku pêşeroja Colemêrgê divê ne bi biryarên rojane, lê bi polîtîkayên aqilane û mayînde were avakirin.
