Karkerên madenê ev 11 roj in ji bo destheqê xwe li ber Wezareta Enerjî û Çavkaniyên Xwezayî di nav çalakiyê de ne. Karkerên madenê diyar kirin ku tiştên ku wezaret û xwediyê Holdînga Yildizê li wan dike bê wijdanî ye.
Karkerên madenê yên giredayê Sendîkaya Madenê ya Xweser ên ku li Holdînga SSS a Yildizê yê Doruk Madenê û Etî Gumuş Madenê yê Elezîzê dixebitin, ji bo destheqê xwe bigirin hatin Enqereyê. Karkarên ku hatin Enqereyê bi daxwaza hevdîtinê bi Wezerata Enerjî û Çavkaniyên Xwezayî re bikin, ev 11 roj in li ber wezaretê di nav çalakiyê de ne. Karker li bendê ne ku bi wezaretê re hevdîtin bikin û nedayîna destheqê wan çareser bike.
Karker ji îstasyona Pirtûkxaneya Mîllî heta ber wezatertê bi awayekê nîv tazî meşiyan. Karker li vir bi yek dengî dirûşmeyên ‘Alparslan Bayraktar derkeve pêşberî me’, ‘Em karker in mafdar in em ê bi ser bikevin’ û ‘Piştgiriyê nedin holdîngan heqê me nexwin’ berz kirin. Karkeran li vir pankarta li ser “Wê zêr û zîv, paxir û madenên me derxist, em nahelin hûn canê me jî derxin’ dinivîsî, rakirin. Karkeran baretên xwe erdê xistin û çalakiya dengderxistinê pêk anîn.
Karkeran li ber wezaretê daxwazên xwe carekê din anîn ziman.
‘Wezaret û Holdînga Yildizê bê wijdantiyê li me dikin’
Murat Çelîk ku li şîrketa Etî Gumuş Madenê ya Xarpetê xebitiye, diyar kir ku bê wijdantî li wan tê kirin û wiha got: “Ez zewicîme û 4 zarokên min hene. Dema ku cejna Remazanê hat min nikaribû ku diyarî ji zarokên xwe re bikirim. Hemna rengî ji bo Cejna Qurbanê jî derbasdar e. Di zarokekê min de nexweşiya epîlepsiyê heye ez nikarim dermankirina wê bikim. Dema em hatin binçavkirinê di Midûriyeta Ewlehiyê de nivîsekî bala min kişand. Gotibûn ku ‘Polîs li dijî yên bê wijdan in’ ye bê wijdan em in an yê ku bê wijdantiyê dike hûn in. Yê bê wijdanî dike wezîr û xwediyê holdînga Yildizê Sebahattîn Yildiz e. Em tenê heqê xwe dixwazin. Hevalên li vir ên ku di malbatên wan de nexweş hene, heye.”
Çalakiya karkeran dê li ber wezaretê 24 seatan bi awayeke çalakiya rûniştinê bidome.
