Înîsiyatîfa Ji Girtiyên Nexweş Re Azadî xwest Abdulrahîm Pamuk ê ku 70 salî ye û tevî nexweşiyên giran jî nayê berdan, demildest bê berdan û tedawiya wî li derve bê kirin.
Înîsiyatîfa Ji Girtiyên Nexweş Re Azadî ji bo balê bikişîne ser rewşa girtiyên nexweş di hefteya 619emîn de çalakiya xwe berdewam kir. Çalakî li Cadeya Sakaryayê ya Enqereyê hate lidarxistin û daxuyanî hate dayîn. Endamên Înîsiyatîfê û rêveberên Şaxa Komeleya Mafên Mirovan (ÎHD) a Enqereyê û parêzvanên mafên mirovan beşdarî daxuyaniyê bûn. Di daxuyaniyê de pankarta “Dermankirin maf e nayê astengkirin, girtiyên nexweş demildest berdin” hat vekirin. Di daxuyaniya vê hefteyê de bal kişandin ser rewşa girtiyê nexweş Abdulrahîm Pamuk.
Daxuyanî ji aliyê Hevserokê Şaxa ÎHDê ya Enqereyê Omer Faruk Yazmaci ve hate xwendin.
Omer Faruk Yazmaci diyar kir ku Abdulrahîm Pamuk tevî ku 70 salî ye û nexweşiyên giran lê peyda bûne nayê berdan û wiha got: “Abdulrahîm Pamuk di Girtigeha Tip a Fyê ya Boluyê de tê ragirtin. Nexweşiyên wî yên weke ulsera mîdeyê, rûviyên wî giran dixebitin, di stû û pişta wî de fitiq heye, osteoporoz (qelsbûna hestiyan), tansiyona zêde û kêmbûna vîtamînan hene. Ji ber van nexweşiyan divê bi awayekî rêk û pêk were dermankirin û di bin çavderiya bijîşkên pîspor de be. Ji bo nexweşiyên wî tetkîk tên kirin lê encama ku tenduristiya wî baş bike nayê girtin. Ji ber temen û nexweşiya tansiyonê, nexweşiya zatureyê ji bo jiyanê wî xetereyan derdixe.”
‘Divê Abdulrahîm Pamuk demildest bê berdan’
Omer Faruk Yazmaci anî ziman ku divê Abdulrahîm Pamuk bê berdan û tedawiya wî li dervê be kirin û ev yek anî ziman: “Malbata wî jî nikare agahiyan werbigire. Hefteyê tenê du caran li ser telefonê dikarin biaxivin û ev jî demeke kin e. Malbata wî dibêje haya wan jê çênabe ku ka wî dibin nexweşxaneyê an dermanan didinê an nadinê. Ji ber nexweşî û temenê mezin nikare di girtîgehê de bimînê. Divê demildest bê berdan û tedawiya wî li derve bi awayekî rêk û pêk bê kirin. Divê malbat jî derbarê rewşê de bê agahdarkirin.”
Çalakî bi berzkirina dirûşmeyan bi dawî bû.
