Ciwanê ji bajarê Ciwanro yê Rojhilatê Kurdistanê bi derfetên xwe li gel hemû astengiyan nêzî hezar kîlometreyan rê hat û xwe gihand Rojava.
Banga seferberiya neteweyî ku ji hêla HSDê û Rêveberiya Xweser ve hate kirin, li çar aliyên Kurdistan û cîhanê deng veda. Li aliyekê gelê Kurd li hemû cîhanê rabûye ser pêyan û ji bo piştgiriya Rojavayê welat li berxwe dide û li aliyê din ciwanên Kurd bi coşek mezin hewl didin xwe bigihînin qadên şer. Ji ciwanên xwe gihandî Rojavayê Kurdistanê yek jî Kêwan e.
Li ser banga seferberiya neteweyî Kêwan jî bêşik û guman ji bajarê Ciwanro yê Rojhilatê Kurdistanê berê xwe da Rojavayê Kurdistanê. Kêwan ligel hemû astengî û zehmetiyan jî di nav çar rojan de nêzî hezar kîlometre rê hat û xwe gihand bajarê Qamişlo yê Rojavayê Kurdistanê. Kêwan ji bo parastina neteweyî û Kurdistanê tev li yekîneyên YPGê bû. Kêwan ku nasnavê Barmîn li xwe kir, bang li hemû ciwanên Kurd kir ku berê xwe bidin Rojavayê Kurdistanê û wiha got: “Hemû ciwanên Kurd ê destê wan çek digire, berê xwe bidin Rojava û tev li berxwedana neteweyî û rûmetê bibin.”
Li gorî agahiyên rayedaran ji destpêka êrişan heta niha ji çar aliyên Kurdistanê bi sedan ciwan gihiştine Rojava û di nav hêzên parastinê de cihê xwe girtine. Rayedaran daxuyand ku helwesta ciwanên Kurd pir pîroz dibînin û di demek gelê Kurd şerê man û nemanê didin de hatina wan hêzek mezin dide Rojavayê Kurdistanê.”
