Piştî mehekê DYAyê li girava Larkê ya stratejîk xist, Îranê jî bi fûzeyên balîstîk êrîşî binkeyên esmanî yên DYAyê yên li Urdunê kir. Di heman demê de liv û tevgerên leşkerî yên Tengava Hurmizê bû sedem kû bihayê neftê piştî demek dirêj cardin ji 90 dolarî derbas bibe.
Şer û mûzakereyên di navbera Îran û DYAyê de bi qeyranên nû berdewam dike. Piştî ku Amerîkayê li Hurmizê Girava Larkê ku xwedî girîngiyeke stratejîk e bombebaran kir, hevsengiyên mûzakereyan bi tevahî xerab bû. Di êrîşa DYAyê de ku mewziyên Pasdaran û keştiyên neftê bûn hedef, herî kêm 2 kes mirin û zerareke mezin gihîşt herêmê. Wezareta Karên Derve ya Îranê ev gav weke binpêkirina hiqûqa navneteweyî pênase kir û ragihand ku dê bersiva pêwist bê dayîn.
Ji Îranê bi bersiva moşekî
Weke bersivdan, Îranê ragihand ku wan binkeyên esmanî yên DYAyê yên li Urdunê (Qral Huseyîn û Muwaffaq Saltî) bi fûzeyên balîstîk hedef girtine. Îranê da zanîn ku bi dijwarî li binesaziya teknîkî û qadên balafiran xistine û zerareke giran gihîştiye binkeyan. Artêşa Urdunê jî diyar kir ku wan 8 fûzeyên balîstîk li hewa îmha kirine û destûr nedane li hedefan bixin.
Karesata li Hurmizê û zextên nû yên Washingtonê
Ewlehiya deryayî ya li Tengava Hurmizê jî hindî diçe xetertir dibe. Tankereke mezin a neftê di encama êrişên moşekî de bi tevahî şewitî. Pasdaran hişyarî da ku hemû keştiyên qaydeyan binpê bikin dê bi heman qederê re rûbihemû bimînin û lêdana keştiyê girte serxwe. Li gorî agahiyên zêrevaniya keştiyan hejmara keştiyên di Hûrmizê re derbas dibin rojane heta 5 keştiyan ketiye.
Bessent: Em dê banqeyan hedef bigirin
Li aliyê din, Serokê DYAyê Donald Trump îdda kir ku hêza leşkerî ya Îranê, keştî, balafir û pergala parastina esmanî bi tevahî hatiye tunekirin. Wezîrê Xezîneyê Scott Bessent jî anî ziman ku ew ê her hefte cezayên nû yên aborî bixin dewreyê û di serî de bankeyên piştgiriyê didin Tehranê bikin hedef.
Bihayê neftê firiya
Ji ber metirsiya astengkirina xeta neftê ya cîhanî, bazarên aboriyê jî bandorek gelek neyînî dîtin. Piştî van geşedanan bihayê nefta Brent ji 90 dolarî borî û gihişt 90.39 dolaran. Nefta WTI jî derket 84.69 dolarî. Rageşiya leşkerî ya di navbera her du welatan de fikarên qeyrana aborî ya cîhanê zêdetir dike.
