Balafira şer a Tirkiyeyê (SÎHA) dîsa êrîşî sivîlên li ser bendava Tişrînê kir. Di êrîşê de 4 sivîl kuştin û 15 sivîl birîndar kirin. Di 10 rojên dawî de bi SÎHAyan 12 welatî hatin kuştin û 70 welatî jî birîndar bûn.
Rêveberiya Xweseriya Demokratîk a Herêma Bakur û Rojhilatê Sûriyeyê têkildarî êrîşa dijî Bendava Tişrînê daxuyaniyek da. Rêveberiya Xweser di daxuyaniyê de anî ziman ku dewleta Tirk careke din kombûna sivîlan a li Bendava Tişrînê hedef girt û di encama vê êrîşa yekser li dijî sivîlan de 4 nobedarên li bendavê şehîd bûn û 15 jî birîndar bûn. Balafireke bêmirov a dewleta Tirk beriya du saetan nobedarên li Bendava Tişrînê bombebaran kiribû. Ev cara sêyemîn e ku nobedarên li ser Bendava Tişrînê bi xwe tên hedefgirtin.
Di êrîşên li ser bendava Tişrinê de heta niha 12 welatî hatin kuştin û 70 welatî jî birîndar bûn
8ê çileyê, şêniyên Bakur û Rojhilatê Sûriyeyê ji bo parastina Bendava Tişrînê û bi armanca nîşandana dijberiya xwe ya li van êrişan ji gelek bajaran ber bi herêmê ve derketibûn rê.
8ê çile
Dema karwanê wesayîtên gel nêzî bendavê bû, dewleta Tirk a dagirker li ser rêya Sirîn-Bendava Tişrînê bi balafirên bêmirov û biçek karwan bombebaran kir. Di encama bombebaranê de 3 sivîl şehîd bûn û 15 jî birîndar bûn.
15ê çile
15ê çileyê jî dewleta Tirk a dagirker li ser rêya Sirîn-Bendava Tişrînê kawanê gel bombebaran kir. Di encamê de şêniyek şehîd bû û 4 jî birîndar bûn.
Di heman rojê de dema ku karwanê gel ê kantona Firatê diçû bendavê, dewleta Tirk a dagirker li cihê kombûna gel da. Li wir jî 3 sivîl şehîd bûn û 19 jî birîndar bûn.
16ê çile
16ê çileyê, balafirên şer ên dewleta Tirk nobedarên Bendava Tişrînê bombebaran kirin. Di encamê de şêniyek şehîd bû, 3 jê rojnamevan 17 şênî jî birîndar bûn.
18ê çile
18ê Çile, balafira SÎHA dîsa êrîş kir û di êrîşa li dijî sivîlên bendava Tişrînê de 4 welatiyan jiyana xwe ji dest dan û 15 welatî birîndar bûn.
Ji 8ê kanûnê heta 10ê çile 51 sivîl kuştin
Ji 8ê kanûnê ve, dewleta Tirk bi bejahî hem bi hewayî Bendava Tişrînê hedef digirin. Dewleta Tirk bi van êrişan armanc dike ku bendavê dagir bike û xelkê herêmê bê av û kehrebe bihêle. Lê HSê bersivên giran dide wan êrişan û destanên leheniyê dinivîsîne. HSDê ragihand ku heta 15 Çileyê di berxwedana dîrokî ya li bendava Tişrîn û Pira Qereqozaqê de, 81 şervanên HSDê şehîd bûne.
Di êrîşan de 51 sivîl kuştin
Êrişên balafirên şer ên Tirkiyeyê 40 roj in didome. Di êrîşên kanûna 2024an de 2 komkujiyên cuda de li navçeya Eyn Îsa û bi taybet gundên El Musterîha û Sifeyan pêk hatin. Di komkujiyên 8 û 10ê kanûna 2024an de 20 sivîl hatin kuştin. Kombûna Jinan a Zenûbiya ragihand ku di 8ê kanûnê de 3 endamên wan li Minbicê bi destê çeteyên dewleta Tirk a dagirker şehîd bûne.
Di 11ê kanûnê de li ser Pira Qereqozaqê di encama gulebarana rasterast a çeteyan a li ser sivîlan de jineke bi temen jiyana xwe ji dest da. Di heman rojê de ambulansa Nexweşxaneya Kobanê hate bombebarankirin, di encamê de ajokar û birîndarekî di ambulansê de bû jiyana xwe ji dest da. Di nava rojê de bi giştî 2 kesan jiyana xwe ji dest dan.
Di 12ê kanûnê de di topbarana artêşa Tirk a li ser gundê Ceada de 2 zarokan jiyana xwe jidest da. Di topbaraneke din de jî ku di 12ê kanûnê pêk hat, dayikek û zarokekî jiyana xwe ji dest da.
Di 13ê kanûnê de komên girêdayî dewleta Tirk xwediyê xwaringeha El Şehbender a Minbicê kuştin.
Di 19ê kanûnê de Nûçegihana ANHAyê Cîhan Bilgîn û rojnamevan Nazim Daştan li ser rêya di navbera Sirîn û bendava Tişrînê ya li başûrê Kobanê de di êrişa balafireke bêmirov de şehîd bûn.
Di 27ê kanûnê de çeteyan êrişî Şaredariya Gel a bajarokê Tişrîn ê kantona Reqayê kirin û parêzvanê wê Mehmûd Muslim kuştin.
Di 31ê kanûnê de leşkerên artêşa Tirk a dagirker ên li ser sînor gundê Qeremox ê gundewarên rojhilatê Kobanê bi guleyan hedef girtin û di encamê de ciwanê bi navê Mihemed Nasan Seîd birîndar bû.
Di 8ê çile de dema karwanê sivîlan ji bo parastinê çû bendava Tişrînê, dagirkeriya Tirk li dijî gel komkujiyek pêk anî û di encamê de 3 sivîl şehîd bûn û 15 sivîl jî birîndar bûn.
Di êrişa balafirên şer ên artêşa Tirk a li ser maleke li gundê Mesreb ê bajarê Sirînê yê başûrê Kobanê ya di 10’ê Çileyê de, ji heman malbatê 4 kes hatin kuştin û 4 jî birîndar bûn.
Di 10ê çileyê de, Hêzên Ewlekariya Hundirîn ragihand ku di encama êrişa balafirên bêmirov ên dewleta Tirk a li ser bejahiya Dêrikê de 2 sivîlan jiyana xwe ji dest daye û sivîlek jî birîndar bûye.
