Serokwekîlê Koma DEM Partiyê Sezaî Temellî anî ziman ku beriya Meclîs bikeve batlaneyê, qanûna çarçoveyê were rojevê mutabakatek heye û wiha got: “Hemû pêşniyarên tên Meclîsê nabin qanûn. Lê em hêvî dikin hemû partî li ser vê qanûnan bibin yek û ev qanûn derbikevin.”
Serokwekîle Koma DEM Partiyê Sezaî Temellî li Meclîsê civîna çapemeniyê li dar xist. Sezaî Temellî di destpêka axaftina xwe de bi mabesta salvegera Komkujiya Madimakê qurbaniyan bibîr anî û wiha got: “Hê jî berpirs nehatine cezakirin û faîl bêceza hatin hiştin. Hê jî ji bo welatiyên me yên Elewî zimanekî nîjadperest tê bikaranîn. Ji Madimakê heta Koçgiriyê em hemû komkujiyan şermezar dikin.”
Pakêta darazê
Sezaî Temellî bal kişand ser paketê nû yê darazê û wiha got: “Meclîs ji ber ku zivistanê nexebitî batlaneya Meclîsê ya meha Tîrmehê tê dirêjkirin. Ji ber ku li ser hev pakêtên nû yên darazê tên pêşiya me. Biryarên ku ji aliyê Dadgeha Destûra Bingehîn ve hatine batalkirin lê ji aliyê desthilatê ve dîsa tên pêşiya me ku bibin qanûn. Heta niha 12 pakêtên darazê li Meclîsê derbas bûne. Hûn van 12 pakêtan bînin cem hev meriv dibîne ku ev 12 pakêt jî bendewariya gel a edaletê re nabe bersiv û bêedaletiyê zêdetir dike. Hê jî sepanên qeyûman berdewam dike. Hê jî biryarên Dadgeha Mafê Mirovan a Ewropa bi cih nehatine. Di van pakêtan de ev yek tune ye. Dibêjin em ê biryardayîna dadgehan zûtir bikin. Li dadgehên bêedaletî heye. Heke hûn biryarên dadgehan zûtir bikin dê bêedaletiyê zûtir bikin. AKPê got em ê YOKê rakin lê piştî hat ber desthilatê, YOKê xurttir kir. Bênîtelîka zanîngehan zêdetir dibe. Her wiha xizaniya xwendekarên zanîngehê jî zêde dibe. Her wiha akademîsyen jî di vê rewşê de ne. Lê pakêteke ku van pirsgirêkan çareser bike jî tune ye. Me bihîstiye ku pakêteke ku zextên li ser zanîngehan zêdetir bike dê were rojeva Meclîsê, lê hê nehatiye.”
‘NATO rêxistinek şer e’
Sezaî Temellî destnîşan kir ku bandora lutkeya NATOyê dê 10 salan bidome û wiha axivî: “Ji bo lutkeya NATOyê her derê Enqereyê hatine girtin û gelek kes hatin binçavkirin û girtin. NATO rêxistineke şer e. NATO şer û pevçûnan derdixîne. Di encama vê lûtkeya NATOyê de şerên nû li pêşiya me ne. Em li dijî şer ini, ji bo wê em ji NATOyê re dibêjin na.”
‘Krîza aborî her ku diçe zêdetir dibe’
Sezaî Temellî destnîşan kir ku welatî ji ber xizaniyê nikarin debara xwe bikin û wiha dirêjî da axaftina xwe: “Feqîriya nav xelkê her ku diçe zêdetir dibe. Her kes xizan dibe. Divê meaşê asgarî di meha Tîrmehê de were zemkirin. Ji bo pêşî li xizaniyê be girtin hewcehî bi polîtîkayeke nû ya aboriyê heye. Divê çavkanî ji ji sermayedaran re neçe û ji hemû welatiyan re wekhev bibe. Ji bo wê jî em ê di dawiya hefteyê de li Amedê Komxebata Aboriyê li dar bixin û amadekariya wê dikin.”
‘Mutabakatek heye’
Sezaî Temellî derbarê pirsa li ser qanûna çarçoveyê jî da zanîn ku beriya ku Meclîs bikeve betlaneyê ev qanûn were rojevê mutabakatek heye û wiha got: “Hemû pêşniyarên tên Meclîsê nabin qanûn. Lê em hêvî dikin hemû partî li ser vê qanûnan bibin yek û ew qanûn derbikevin. Meclîs dikare navber jî nede û xebata xwe dirêj bike.”
