Colemêrg – Serokê Baroya Colemêrgê Ergun Canan diyar kir ku dîmenê derbarê ÎŞKURê yên li navçeya Şemzînanê hatine parvekirin rast in û li ÎŞKURê bêedaletî û nehiqûqî heye. Baroyê li dijî neheqiya ÎŞKURê gilî kiribû û delîl radestî dozgeriyê kiribû.
Li navçeya Şemzînanê ya Colemêrgê, derbarê wergirtina personelên ÎŞKURê de îdiayên giran ên gendelî û bertîlê ketin rojevê, piştî van îddayan navenda giştî ya AKPê biryara fesixkirina rêxistina xwe ya navçeyê da. Piştî vê biryara fesixkirinê, dîmenên ku behsa wan dihat kirin hatin belavkirin û bi vî awayî gendelî bi belgeyan hat piştrastkirin. Parvekirina van dîmenan di nav raya giştî de bû sedema berteke hê mezintir. Li ser vê nerazîbûna gel, Baroya Colemêrgê li dijî vê neheqiyê dest bi hewldanên hiqûqî kir. Baroya Colemêrgê derbarê vê gendeliya li ÎŞKURê de gilî kir û delîl radestî dozgeriyê kir.
‘Heqê kesên feqîr tê xwarin’
Serokê Baroya Colemêrgê Ergun Canan derbarê mijarê de ji Ajansa Welat re axivî û diyar kir ku dîmenên ku derbarê ÎŞKURê de hatine parvekirin rast in û wiha got: “Beriya vê dîmen jî me derbarê ÎŞKURê de daxuyanî dabû. Me gotibû ku îdiayên torpîlê hene, di nav malbatekê de du kes an sê kes ji bo ÎŞKURê tên girtin. Belê heq ew e ku mirovên feqîr û yên rewşa wan xirab e bigirin kar û bişixul in lê mixabin tiştên ku tên guhê me û em dibînin, mirovên dewlemend dixin kar û di nav ÎŞKURê de ne.”
‘ÎŞKUR saziyeke dewletê ye, ne ya partiyek siyasî ye’
Ergun Canan bal kişand ser têkiliya partiyên siyasî û saziyên dewletê û wiha got: “Heke li wir torpîlek hebe ‘ku heye’ hingê mirov li partiya ku desthilatê dinêre, îro desthilat AK Partî ye û temsîlkarên wê diyar in. Em dibêjin ku ÎŞKUR ya dewletê ye, saziyeke dewletê ye, ne ya partiyek siyasî ye û ne ya desthilatê ye. Divê van tiştan qet têkilî vî karî nekin. Lê mixabin li Colemêrgê, Geverê, Şemzînanê, Çelê û Bajêrgeyê berevajiya vê yekê tişt diqewimin.”
‘Ev ne edaletî ye û ne hiqûqî ye’
Ergun Canan destnîşan kir ku pergala girtina kar a karkeran ne edaletî ye û ev yek anî ziman: “Ji bo karkeran dibêjin ‘divê tu bibe alîgirê berjewendiyê, piştgirî bide me an bibe endamê me’. Ev ne edaletî ye û ne hiqûqî ye. Divê ev kar bi rêya NOTERê çêbibe da ku neheqî li kesî neyê kirin. Em ê şopdarê vê dozê bin.”
