Li Kendava Basrayê û Tengava Hurmizê qeyrana di navbera DYA û Îranê bi pêngavên nû didome. Êrîşên dualî yên li ser keştiyên şer û tankerên neftê, torên bazirganiya gerdûnî hejandin û bihayê bermilê nefta Brent heta 99 dolaran bilind kir. Ev geşedan xetereya qrîzeke nû ya sotemeniyê li Tirkiyeyê û gelek welatên cîhanê zêde dike.
Fermandariya Hêzên Navendî ya DYAyê (CENTCOM) ragihand ku di bersiva êrîşên fûzeyî de, li Kendava Basrayê 5 tankerên neftê yên Îranê hatine îmhakirin. Li ser vê yekê, Artêşa Pasdaran a Îranê jî daxuyand ku wan 2 keştiyên şer ên DYAyê û 8 tankerên neftê birîndar kirine û 10 keştiyên din jî hedef girtine. Îranê destnîşan kir ku kontrola Tengava Hurmizê di destê wan de ye.
Bihayê neftê ber bi lûtkeyê ve diçe
Astengbûna trafîka behrê ya li Tengava Hurmizê rasterast bandor li piyaseyê kir. Bihayê Nefta Brent a ku gihiştiye 99 dolaran, sînorê psîkolojîk ê 100 dolarî dide zorê. Pisporên enerjiyê hişyarî didin ku ambor û aloziyên leşkerî yên li herêmê dikarin bihayê neftê di demeke kurt de ji 100 dolarî derbas bikin.
Zamên nû di rê de ne
Zêdebûna bilez a bihayê neftê li Tirkiyeyê jî xetereya bihabûna sotemeniyê anî rojevê. Piştî ku di 4ê Îlonê de 8 lîre û 24 quruş zam hatibû kirin li ser mazotê, tê payîn ku ev geşedana li Hurmizê bibe sedema pêlek nû ya zammên giran li ser sotemeniyê.
