Her ku şer giran dibe êrişên hewayî, deryayî û agahiyên li ser operasyonên bejahî yên li dijî Îranê zêdetir dibin.
Li gor agahiyên herî dawî êrişeke Îsraîlê li ofîsa Televîzyona El-Erebî ya li Tehranê pêk hat, Serokê Meclîsa Îranê, Amerîkayê bi amadekariya êrişeke bejahî tawanbar kir û gelek êrişên bi ser heremên hesas û kirîtîk de pêk hatin.
Di êrişa bi ser TVyê de herî kêm 10 kes birîndar bûn
Li gorî daxuyaniyeke kanala televîzyonê, roja Yekşemê êrişeke hewayî ya Îsraîlê li dijî avahiya ofîsa kanala nûçeyan a Qeterî El-Erebî ku li Tehranê ye, pêk hat. Li gorî Heyva Sor a Îranê, di êrişê de herî kêm 10 kes birîndar bûne.
Kanalê bi rêya Xê ragihand ku moşekek Îsraîlî avahiya Al Araby TV a li paytext Tehranê ket û bûye sedema zirareke mezin û weşanên zindî neçar man bên rawestandin. Dîmenên ji hundirê avahiyê, bermahiyên hilweşî û alavên zirar dîtîn nîşan dan. Her wiha piştî vê êrişî xesar û ziyan gihîştiye avahiyên nêzîk jî.
Serokê Îranê Qelîbaef: Amerîka planên veşartî ya şerekî bejahiyê dike
Li gorî medyaya fermî ya Îranê, Serokê Meclîsa Îranê Mihemed Baqer Qelîbaef got ku Washington di vê dema ku banga danûstandinan dike de bi awayeke dizî jî ji bo operasyoneke bejahiyê amadekariyan dike. Qelîbaef hişyarî da ku hêzên çekdar ên Îranê li benda danîna leşkerên Amerîkayê ne û dê hem leşkerên Amerîkî hem jî hevalbendên wan ên herêmî ceza bikin.
Tehran di bin dumana teqînan de ma
Artêşa Îsraîlê li ser hesbê xwe yê fermî yê medya dîjîtal eşkere kir ku êrişên giran birine ser Tehranê. Piştî vê agahiyê ajansên fermî yên Îranê jî eşkere kirin ku îro li Tehranê piştî teqînên mezin hatine bihîstin û dûman ber bi esman ve rabûye. Hat diyarkirin ku di kêliyên teqînê de sîstemên parastina hewayî hatine aktîfkirin û encama teqîna ne diyar e.
Hejmarên êrişan her roj zêdetir dibin
Di agahiyeke din ya ajansên Îranê de hat ragihandin ku di êrişeke li ser benderek li parêzgeha Hurmuzê de pênc kes hatin kuştin û zirar gihîşte keştiyên li kendavê bûn.
Li gor daxuyaniya malpera Middle East Eye Îranê li dijî başûrê Îsraîlê êrişa moşekî pêk anî û li dijî êrişê sîstemên parastina hewayî ya Îsraîlê ketin dewrê û sîrenan dest bi lêdanê kirin e. Her wiha Tehranê diyar kir ku êrişên wan ên li dijî gelek hedefan bi serketiye û xesareke zêde dane radarek û binesaziyeke Îsraîlê.
Rûsyayê jî ji bo rewşa santrala nukleerî ya Bûşehra Îranê piştî êrişên dubare pêk hatin hişyarî da ku xetereya pêkhatine gemariya radyasyonê heye.
Di gelek agahiyên tên dayîn de tê diyarkirin ku ji ber zêdebûna hejmara êrişan li herêma Kendavê, fikarên derbarê dabînkirina sotemeniyê, zibil û çavkaniyên bijîjkî yên jiyanî de zêde dibe.
